Vessantaravagga

mil6.3.9:4.1 Aparampi, mahārāja, uttariṁ kāraṇaṁ suṇohi ekantasukhaṁ nibbānaṁ, na dukkhena missaṁ, aññaṁ dukkhaṁ, aññaṁ nibbānanti.

mil6.3.9:4.2 Atthi, mahārāja, ācariyānaṁ sippavantānaṁ sippasukhaṁ nāmā”ti?

mil6.3.9:4.3 “Āma, bhante, atthi ācariyānaṁ sippavantānaṁ sippasukhan”ti.

mil6.3.9:4.4 “Api nu kho taṁ, mahārāja, sippasukhaṁ dukkhena missan”ti?

mil6.3.9:4.5 “Na hi, bhante”ti.

mil6.3.9:4.6 “Kissa pana te, mahārāja, ācariyā ācariyānaṁ abhivādanapaccuṭṭhānena udakāharaṇagharasammajjanadantakaṭṭhamukhodakānuppadānena ucchiṭṭhapaṭiggahaṇaucchādananahāpanapādaparikammena sakacittaṁ nikkhipitvā paracittānuvattanena dukkhaseyyāya visamabhojanena kāyaṁ ātāpentī”ti?

mil6.3.9:4.7 “Netaṁ, bhante nāgasena, sippasukhaṁ nāma, sippapariyesanāya pubbabhāgo eso, dukkhena, bhante nāgasena, ācariyā sippaṁ pariyesitvā sippasukhaṁ anubhavanti, evaṁ, bhante nāgasena, sippasukhaṁ dukkhena amissaṁ, aññaṁ taṁ sippasukhaṁ, aññaṁ dukkhan”ti.

mil6.3.9:4.8 “Evameva kho, mahārāja, ekantasukhaṁ nibbānaṁ, na dukkhena missaṁ.

mil6.3.9:4.9 Ye pana taṁ nibbānaṁ pariyesanti, te kāyañca cittañca ātāpetvā ṭhānacaṅkamanisajjāsayanāhāraṁ pariggahetvā middhaṁ uparundhitvā āyatanāni paṭipīḷetvā kāyañca jīvitañca pariccajitvā dukkhena nibbānaṁ pariyesitvā ekantasukhaṁ nibbānaṁ anubhavanti, ācariyā viya sippasukhaṁ.

mil6.3.9:4.10 Evaṁ, mahārāja, ekantasukhaṁ nibbānaṁ, na dukkhena missaṁ, aññaṁ dukkhaṁ, aññaṁ nibbānan”ti.

mil6.3.9:4.11 “Sādhu, bhante nāgasena, evametaṁ tathā sampaṭicchāmī”ti.