Buddhavagga

mil6.1.1:8.1 Api ca kho, mahārāja, buddhānaṁ bhagavantānaṁ sabhāvapakati esāyaṁ, ekoyeva buddho loke uppajjati.

mil6.1.1:8.2 Kasmā kāraṇā?

mil6.1.1:8.3 Mahantatāya sabbaññubuddhaguṇānaṁ.

mil6.1.1:8.4 Aññampi, mahārāja, yaṁ loke mahantaṁ, taṁ ekaṁyeva hoti.

mil6.1.1:8.5 Pathavī, mahārāja, mahantī, sā ekā yeva.

mil6.1.1:8.6 Sāgaro mahanto, so ekoyeva.

mil6.1.1:8.7 Sineru girirājā mahanto, so ekoyeva.

mil6.1.1:8.8 Ākāso mahanto, so ekoyeva.

mil6.1.1:8.9 Sakko mahanto, so ekoyeva.

mil6.1.1:8.10 Māro mahanto, so ekoyeva.

mil6.1.1:8.11 Mahābrahmā mahanto, so ekoyeva.

mil6.1.1:8.12 Tathāgato arahaṁ sammāsambuddho mahanto, so eko yeva lokasmiṁ.

mil6.1.1:8.13 Yattha te uppajjanti, tattha aññassa okāso na hoti, tasmā, mahārāja, tathāgato arahaṁ sammāsambuddho ekoyeva lokasmiṁ uppajjatī”ti.