Iddhibalavagga

mil5.1.2:3.1 Tatridaṁ dutiyaṁ cittaṁ vibhattamāpajjati—

mil5.1.2:3.2 ye te, mahārāja, sotāpannā pihitāpāyā diṭṭhippattā viññātasatthusāsanā, tesaṁ taṁ cittaṁ tīsu ṭhānesu lahukaṁ uppajjati lahukaṁ pavattati.

mil5.1.2:3.3 Uparibhūmīsu garukaṁ uppajjati dandhaṁ pavattati.

mil5.1.2:3.4 Kiṁ kāraṇā?

mil5.1.2:3.5 Tīsu ṭhānesu cittassa parisuddhattā upari kilesānaṁ appahīnattā.

mil5.1.2:3.6 Yathā, mahārāja, vaṁsanāḷassa tipabbagaṇṭhiparisuddhassa upari sākhājaṭājaṭitassa ākaḍḍhiyantassa yāva tipabbaṁ tāva lahukaṁ eti, tato upari thaddhaṁ.

mil5.1.2:3.7 Kiṁ kāraṇā?

mil5.1.2:3.8 Heṭṭhā parisuddhattā upari sākhājaṭājaṭitattā.

mil5.1.2:3.9 Evameva kho, mahārāja, ye te sotāpannā pihitāpāyā diṭṭhippattā viññātasatthusāsanā, tesaṁ taṁ cittaṁ tīsu ṭhānesu lahukaṁ uppajjati lahukaṁ pavattati, uparibhūmīsu garukaṁ uppajjati dandhaṁ pavattati.

mil5.1.2:3.10 Kiṁ kāraṇā?

mil5.1.2:3.11 Tīsu ṭhānesu cittassa parisuddhattā upari kilesānaṁ appahīnattā, idaṁ dutiyaṁ cittaṁ.