7. Pāpapuññānaṁ appānappabhāvapañha

mil3.7.7:1.1 Rājā āha—

mil3.7.7:1.2 “bhante nāgasena, kataraṁ nu kho bahutaraṁ puññaṁ vā apuññaṁ vā”ti?

mil3.7.7:1.3 “Puññaṁ kho, mahārāja, bahutaraṁ, apuññaṁ thokan”ti.

mil3.7.7:1.4 “Kena kāraṇenā”ti?

mil3.7.7:1.5 “Apuññaṁ kho, mahārāja, karonto vippaṭisārī hoti ‘pāpakammaṁ mayā katan’ti, tena pāpaṁ na vaḍḍhati.

mil3.7.7:1.6 Puññaṁ kho, mahārāja, karonto avippaṭisārī hoti, avippaṭisārino pāmojjaṁ jāyati, pamuditassa pīti jāyati, pītimanassa kāyo passambhati, passaddhakāyo sukhaṁ vedeti, sukhino cittaṁ samādhiyati, samāhito yathābhūtaṁ pajānāti, tena kāraṇena puññaṁ vaḍḍhati.

mil3.7.7:1.7 Puriso kho, mahārāja, chinnahatthapādo bhagavato ekaṁ uppalahatthaṁ datvā ekanavutikappāni vinipātaṁ na gacchissati.

mil3.7.7:1.8 Imināpi, mahārāja, kāraṇena bhaṇāmi ‘puññaṁ bahutaraṁ, apuññaṁ thokan’”ti.