2. Buddhassaanuttarabhāvapañha

mil3.5.2:1.1 Rājā āha—

mil3.5.2:1.2 “bhante nāgasena, buddho anuttaro”ti?

mil3.5.2:1.3 “Āma, mahārāja, bhagavā anuttaro”ti.

mil3.5.2:1.4 “Kathaṁ, bhante nāgasena, adiṭṭhapubbaṁ jānāsi ‘buddho anuttaro’”ti?

mil3.5.2:1.5 “Taṁ kiṁ maññasi, mahārāja, yehi adiṭṭhapubbo mahāsamuddo, jāneyyuṁ te, mahārāja, mahanto kho mahāsamuddo gambhīro appameyyo duppariyogāho, yatthimā pañca mahānadiyo satataṁ samitaṁ appenti, seyyathidaṁ—

mil3.5.2:1.6 gaṅgā yamunā aciravatī sarabhū mahī, neva tassa ūnattaṁ vā pūrattaṁ vā paññāyatī”ti?

mil3.5.2:1.7 “Āma, bhante, jāneyyun”ti.

mil3.5.2:1.8 “Evameva kho, mahārāja, sāvake mahante parinibbute passitvā jānāmi ‘bhagavā anuttaro’”ti.