cnd9:16.1 <b>Passāmahaṁ devamanussaloke</b>ti.
BAGIAN 16
cnd9:16.2 <b>Devā</b>ti tayo devā—
cnd9:16.3 sammutidevā, upapattidevā, visuddhidevā.
cnd9:16.4 Katame sammutidevā?
cnd9:16.5 Sammutidevā vuccanti rājāno ca rājakumārā ca deviyo ca.
cnd9:16.6 Ime vuccanti sammutidevā.
cnd9:16.7 Katame upapattidevā?
cnd9:16.8 Upapattidevā vuccanti cātumahārājikā devā tāvatiṁsā devā yāmā devā tusitā devā nimmānaratī devā paranimmitavasavattī devā brahmakāyikā devā ye ca devā taduttari.
cnd9:16.9 Ime vuccanti upapattidevā.
cnd9:16.10 Katame visuddhidevā?
cnd9:16.11 Visuddhidevā vuccanti tathāgatasāvakā arahanto khīṇāsavā ye ca paccekabuddhā.
cnd9:16.12 Ime vuccanti visuddhidevā.
cnd9:16.13 Bhagavā sammutidevānañca upapattidevānañca visuddhidevānañca devo ca atidevo ca devātidevo ca sīhasīho nāganāgo gaṇigaṇī munimunī rājarājā.
cnd9:16.14 <b>Passāmahaṁ devamanussaloke</b>ti manussaloke devaṁ passāmi atidevaṁ passāmi devātidevaṁ passāmi dakkhāmi olokemi nijjhāyāmi upaparikkhāmīti—
cnd9:16.15 passāmahaṁ devamanussaloke.