Pucchāniddesa

cnd5:12.1 <b>Vevicchā pamādā nappakāsatī</b>ti.

cnd5:12.2 <b>Vevicchaṁ</b> vuccati pañca macchariyāni—

cnd5:12.3 āvāsamacchariyaṁ, kulamacchariyaṁ, lābhamacchariyaṁ, vaṇṇamacchariyaṁ, dhammamacchariyaṁ.

cnd5:12.4 Yaṁ evarūpaṁ maccheraṁ maccharāyanā maccharāyitattaṁ vevicchaṁ kadariyaṁ kaṭukañcukatā aggahitattaṁ cittassa—

cnd5:12.5 idaṁ vuccati macchariyaṁ.

cnd5:12.6 Api ca khandhamacchariyampi macchariyaṁ, dhātumacchariyampi macchariyaṁ, āyatanamacchariyampi macchariyaṁ, gāho vuccati macchariyaṁ.

cnd5:12.7 <b>Pamādo</b> vattabbo—

cnd5:12.8 kāyaduccarite vā vacīduccarite vā manoduccarite vā pañcasu kāmaguṇesu vā cittassa vosaggo vosaggānuppadānaṁ kusalānaṁ dhammānaṁ bhāvanāya asakkaccakiriyatā asātaccakiriyatā anaṭṭhitakiriyatā olīnavuttitā nikkhittacchandatā nikkhittadhuratā anāsevanā abhāvanā abahulīkammaṁ anadhiṭṭhānaṁ ananuyogo pamādo.

cnd5:12.9 Yo evarūpo pamādo pamajjanā pamajjitattaṁ—

cnd5:12.10 ayaṁ vuccati pamādo.

cnd5:12.11 <b>Vevicchā pamādā nappakāsatī</b>ti iminā ca macchariyena iminā ca pamādena loko nappakāsati nappabhāsati na tapati na virocati na ñāyati na paññāyatīti—

cnd5:12.12 vevicchā pamādā nappakāsati.