cnd5:11.1 <b>Ajitā</b>ti bhagavā taṁ brāhmaṇaṁ nāmena ālapati.
BAGIAN 11
cnd5:11.2 <b>Bhagavā</b>ti gāravādhivacanaṁ.
cnd5:11.3 Api ca, bhaggarāgoti bhagavā;
cnd5:11.4 bhaggadosoti bhagavā;
cnd5:11.5 bhaggamohoti bhagavā;
cnd5:11.6 bhaggamānoti bhagavā;
cnd5:11.7 bhaggadiṭṭhīti bhagavā;
cnd5:11.8 bhaggakaṇḍakoti bhagavā;
cnd5:11.9 bhaggakilesoti bhagavā;
cnd5:11.10 bhaji vibhaji pavibhaji dhammaratananti bhagavā;
cnd5:11.11 bhavānaṁ antakaroti bhagavā;
cnd5:11.12 bhāvitakāyo bhāvitasīlo bhāvitacitto bhāvitapaññoti bhagavā;
cnd5:11.13 bhaji vā bhagavā araññavanapatthāni pantāni senāsanāni appasaddāni appanigghosāni vijanavātāni manussarāhasseyyakāni paṭisallānasāruppānīti bhagavā;
cnd5:11.14 bhāgī vā bhagavā cīvarapiṇḍapātasenāsanagilānapaccayabhesajjaparikkhārānanti bhagavā;
cnd5:11.15 bhāgī vā bhagavā attharasassa dhammarasassa vimuttirasassa adhisīlassa adhicittassa adhipaññāyāti bhagavā;
cnd5:11.16 bhāgī vā bhagavā catunnaṁ jhānānaṁ catunnaṁ appamaññānaṁ catunnaṁ arūpasamāpattīnanti bhagavā;
cnd5:11.17 bhāgī vā bhagavā aṭṭhannaṁ vimokkhānaṁ aṭṭhannaṁ abhibhāyatanānaṁ navannaṁ anupubbasamāpattīnanti bhagavā;
cnd5:11.18 bhāgī vā bhagavā dasannaṁ saññābhāvanānaṁ kasiṇasamāpattīnaṁ ānāpānassatisamādhissa asubhasamāpattiyāti bhagavā;
cnd5:11.19 bhāgī vā bhagavā catunnaṁ satipaṭṭhānānaṁ catunnaṁ sammappadhānānaṁ catunnaṁ iddhipādānaṁ pañcannaṁ indriyānaṁ pañcannaṁ balānaṁ sattannaṁ bojjhaṅgānaṁ ariyassa aṭṭhaṅgikassa maggassāti bhagavā;
cnd5:11.20 bhāgī vā bhagavā dasannaṁ tathāgatabalānaṁ catunnaṁ vesārajjānaṁ catunnaṁ paṭisambhidānaṁ channaṁ abhiññānaṁ channaṁ buddhadhammānanti bhagavā;
cnd5:11.21 bhagavāti netaṁ nāmaṁ mātarā kataṁ na pitarā kataṁ na bhātarā kataṁ na bhaginiyā kataṁ na mittāmaccehi kataṁ na ñātisālohitehi kataṁ na samaṇabrāhmaṇehi kataṁ na devatāhi kataṁ.
cnd5:11.22 Vimokkhantikametaṁ buddhānaṁ bhagavantānaṁ bodhiyā mūle saha sabbaññutañāṇassa paṭilābhā sacchikā paññatti, yadidaṁ bhagavāti—
cnd5:11.23 ajitāti bhagavā.