cnd23:213.1 Katamaṁ paccayapaṭisevanasaṅkhātaṁ kuhanavatthu?
BAGIAN 213
cnd23:213.2 Idha gahapatikā bhikkhuṁ nimantenti cīvarapiṇḍapātasenāsanagilānapaccayabhesajjaparikkhārehi, so pāpiccho icchāpakato atthiko cīvarapiṇḍapātasenāsanagilānapaccayabhesajjaparikkhārānaṁ bhiyyokamyataṁ upādāya cīvaraṁ paccakkhāti, piṇḍapātaṁ paccakkhāti, senāsanaṁ paccakkhāti, gilānapaccayabhesajjaparikkhāraṁ paccakkhāti.
cnd23:213.3 So evamāha—
cnd23:213.4 “kiṁ samaṇassa mahagghena cīvarena.
cnd23:213.5 Etaṁ sāruppaṁ yaṁ samaṇo susānā vā saṅkārakūṭā vā pāpaṇikā vā nantakāni uccinitvā saṅghāṭikaṁ karitvā dhāreyya.
cnd23:213.6 Kiṁ samaṇassa mahagghena piṇḍapātena.
cnd23:213.7 Etaṁ sāruppaṁ yaṁ samaṇo uñchācariyāya piṇḍiyālopena jīvikaṁ kappeyya.
cnd23:213.8 Kiṁ samaṇassa mahagghena senāsanena.
cnd23:213.9 Etaṁ sāruppaṁ yaṁ samaṇo rukkhamūliko vā assa sosāniko vā abbhokāsiko vā.
cnd23:213.10 Kiṁ samaṇassa mahagghena gilānapaccayabhesajjaparikkhārena.
cnd23:213.11 Etaṁ sāruppaṁ yaṁ samaṇo pūtimuttena vā haritakīkhaṇḍena vā osadhaṁ kareyyā”ti.
cnd23:213.12 Tadupādāya lūkhaṁ cīvaraṁ dhāreti lūkhaṁ piṇḍapātaṁ paribhuñjati lūkhaṁ senāsanaṁ paṭisevati lūkhaṁ gilānapaccayabhesajjaparikkhāraṁ paṭisevati.
cnd23:213.13 Tamenaṁ gahapatikā evaṁ jānanti—
cnd23:213.14 “ayaṁ samaṇo appiccho santuṭṭho pavivitto asaṁsaṭṭho āraddhavīriyo dhutavādo”ti.
cnd23:213.15 Bhiyyo bhiyyo nimantenti cīvarapiṇḍapātasenāsanagilānapaccayabhesajjaparikkhārehi.
cnd23:213.16 So evamāha—
cnd23:213.17 “tiṇṇaṁ sammukhībhāvā saddho kulaputto bahuṁ puññaṁ pasavati, saddhāya sammukhībhāvā saddho kulaputto bahuṁ puññaṁ pasavati, deyyadhammassa sammukhībhāvā saddho kulaputto bahuṁ puññaṁ pasavati, dakkhiṇeyyānaṁ sammukhībhāvā saddho kulaputto bahuṁ puññaṁ pasavati.
cnd23:213.18 Tumhākañcevāyaṁ saddhā atthi, deyyadhammo ca saṁvijjati, ahañca paṭiggāhako.
cnd23:213.19 Sacehaṁ na paṭiggahessāmi, evaṁ tumhe puññena paribāhirā bhavissatha.
cnd23:213.20 Na mayhaṁ iminā attho.
cnd23:213.21 Api ca tumhākaṁyeva anukampāya paṭiggaṇhāmī”ti.
cnd23:213.22 Tadupādāya bahumpi cīvaraṁ paṭiggaṇhāti, bahumpi piṇḍapātaṁ paṭiggaṇhāti, bahumpi senāsanaṁ paṭiggaṇhāti, bahumpi gilānapaccayabhesajjaparikkhāraṁ paṭiggaṇhāti.
cnd23:213.23 Yā evarūpā bhākuṭikā bhākuṭiyaṁ kuhanā kuhāyanā kuhitattaṁ—
cnd23:213.24 idaṁ paccayapaṭisevanasaṅkhātaṁ kuhanavatthu.