cnd22:48.1 Kathaṁ bhagavā eko anuttaraṁ sammāsambodhiṁ abhisambuddhoti eko.
BAGIAN 48
cnd22:48.2 Bodhi vuccati catūsu maggesu ñāṇaṁ paññā paññindriyaṁ paññābalaṁ dhammavicayasambojjhaṅgo vīmaṁsā vipassanā sammādiṭṭhi.
cnd22:48.3 Bhagavā tena bodhiñāṇena “sabbe saṅkhārā aniccā”ti bujjhi,
cnd22:48.4 “sabbe saṅkhārā dukkhā”ti bujjhi,
cnd22:48.5 “sabbe dhammā anattā”ti bujjhi …pe…
cnd22:48.6 “yaṁ kiñci samudayadhammaṁ sabbaṁ taṁ nirodhadhamman”ti bujjhi.
cnd22:48.7 Atha vā yaṁ bujjhitabbaṁ anubujjhitabbaṁ paṭibujjhitabbaṁ sambujjhitabbaṁ adhigantabbaṁ phassitabbaṁ sacchikātabbaṁ sabbaṁ taṁ tena bodhiñāṇena bujjhi anubujjhi paṭibujjhi sambujjhi adhigacchi phassesi sacchākāsi.
cnd22:48.8 Evaṁ bhagavā eko anuttaraṁ sammāsambodhiṁ abhisambuddhoti eko.