cnd19:5.1 Kathaṁ bhagavā maṁsacakkhunāpi cakkhumā?
BAGIAN 5
cnd19:5.2 Maṁsacakkhumhi bhagavato pañca vaṇṇā saṁvijjanti—
cnd19:5.3 nīlo ca vaṇṇo, pītako ca vaṇṇo, lohitako ca vaṇṇo, kaṇho ca vaṇṇo, odāto ca vaṇṇo (…).
cnd19:5.4 Yattha ca akkhilomāni patiṭṭhitāni taṁ nīlaṁ hoti sunīlaṁ pāsādikaṁ dassaneyyaṁ umāpupphasamānaṁ.
cnd19:5.5 Tassa parato pītakaṁ hoti supītakaṁ suvaṇṇavaṇṇaṁ pāsādikaṁ dassaneyyaṁ kaṇikārapupphasamānaṁ.
cnd19:5.6 Ubhato ca akkhikūṭāni bhagavato lohitakāni honti sulohitakāni pāsādikāni dassaneyyāni indagopakasamānāni.
cnd19:5.7 Majjhe kaṇhaṁ hoti sukaṇhaṁ alūkhaṁ siniddhaṁ pāsādikaṁ dassaneyyaṁ addāriṭṭhakasamānaṁ.
cnd19:5.8 Tassa parato odātaṁ hoti suodātaṁ setaṁ paṇḍaraṁ pāsādikaṁ dassaneyyaṁ osadhitārakasamānaṁ.
cnd19:5.9 Tena bhagavā pākatikena maṁsacakkhunā attabhāvapariyāpannena purimasucaritakammābhinibbattena samantā yojanaṁ passati divā ceva rattiñca.
cnd19:5.10 Yadā hi caturaṅgasamannāgato andhakāro hoti sūriyo ca atthaṅgato hoti;
cnd19:5.11 kāḷapakkho ca uposatho hoti, tibbo ca vanasaṇḍo hoti, mahā ca kāḷamegho abbhuṭṭhito hoti.
cnd19:5.12 Evarūpe caturaṅgasamannāgate andhakāre samantā yojanaṁ passati.
cnd19:5.13 Natthi so kuṭṭo vā kavāṭaṁ vā pākāro vā pabbato vā gaccho vā latā vā āvaraṇaṁ rūpānaṁ dassanāya.
cnd19:5.14 Ekañce tilaphalaṁ nimittaṁ katvā tilavāhe pakkhipeyya, taṁyeva tilaphalaṁ uddhareyya.
cnd19:5.15 Evaṁ parisuddhaṁ bhagavato pākatikaṁ maṁsacakkhu.
cnd19:5.16 Evaṁ bhagavā maṁsacakkhunāpi cakkhumā.