dn9:36.1 “Evameva kho, poṭṭhapāda, ye te samaṇabrāhmaṇā evaṁvādino evaṁdiṭṭhino:
BAGIAN 36
dn9:36.2 ‘ekantasukhī attā hoti arogo paraṁ maraṇā’ti.
dn9:36.3 Tyāhaṁ upasaṅkamitvā evaṁ vadāmi:
dn9:36.4 ‘saccaṁ kira tumhe āyasmanto evaṁvādino evaṁdiṭṭhino:
dn9:36.5 “ekantasukhī attā hoti arogo paraṁ maraṇā”’ti?
dn9:36.6 Te ce me evaṁ puṭṭhā ‘āmā’ti paṭijānanti.
dn9:36.7 Tyāhaṁ evaṁ vadāmi:
dn9:36.8 ‘api pana tumhe āyasmanto ekantasukhaṁ lokaṁ jānaṁ passaṁ viharathā’ti?
dn9:36.9 Iti puṭṭhā ‘no’ti vadanti.
dn9:36.10 Tyāhaṁ evaṁ vadāmi:
dn9:36.11 ‘api pana tumhe āyasmanto ekaṁ vā rattiṁ ekaṁ vā divasaṁ upaḍḍhaṁ vā rattiṁ upaḍḍhaṁ vā divasaṁ ekantasukhiṁ attānaṁ sañjānāthā’ti?
dn9:36.12 Iti puṭṭhā ‘no’ti vadanti.
dn9:36.13 Tyāhaṁ evaṁ vadāmi:
dn9:36.14 ‘api pana tumhe āyasmanto jānātha:
dn9:36.15 “ayaṁ maggo ayaṁ paṭipadā ekantasukhassa lokassa sacchikiriyāyā”’ti?
dn9:36.16 Iti puṭṭhā ‘no’ti vadanti.
dn9:36.17 Tyāhaṁ evaṁ vadāmi:
dn9:36.18 ‘api pana tumhe āyasmanto yā tā devatā ekantasukhaṁ lokaṁ upapannā, tāsaṁ bhāsamānānaṁ saddaṁ suṇātha:
dn9:36.19 “suppaṭipannāttha, mārisā, ujuppaṭipannāttha, mārisā, ekantasukhassa lokassa sacchikiriyāya;
dn9:36.20 mayampi hi, mārisā, evaṁpaṭipannā ekantasukhaṁ lokaṁ upapannā”’ti?
dn9:36.21 Iti puṭṭhā ‘no’ti vadanti.
dn9:36.22 Taṁ kiṁ maññasi, poṭṭhapāda, nanu evaṁ sante tesaṁ samaṇabrāhmaṇānaṁ appāṭihīrakataṁ bhāsitaṁ sampajjatī”ti?
dn9:36.23 “Addhā kho, bhante, evaṁ sante tesaṁ samaṇabrāhmaṇānaṁ appāṭihīrakataṁ bhāsitaṁ sampajjatī”ti.