Mahāsīhanādasutta

dn8:14.0 3. Tapopakkamakathā

dn8:14.1 Evaṁ vutte, acelo kassapo bhagavantaṁ etadavoca:

dn8:14.2 “imepi kho, āvuso gotama, tapopakkamā etesaṁ samaṇabrāhmaṇānaṁ sāmaññasaṅkhātā ca brahmaññasaṅkhātā ca.

dn8:14.3 Acelako hoti, muttācāro, hatthāpalekhano, naehibhaddantiko, natiṭṭhabhaddantiko, nābhihaṭaṁ, na uddissakataṁ, na nimantanaṁ sādiyati.

dn8:14.4 So na kumbhimukhā paṭiggaṇhāti, na kaḷopimukhā paṭiggaṇhāti, na eḷakamantaraṁ, na daṇḍamantaraṁ, na musalamantaraṁ, na dvinnaṁ bhuñjamānānaṁ, na gabbhiniyā, na pāyamānāya, na purisantaragatāya, na saṅkittīsu, na yattha sā upaṭṭhito hoti, na yattha makkhikā saṇḍasaṇḍacārinī, na macchaṁ, na maṁsaṁ, na suraṁ, na merayaṁ, na thusodakaṁ pivati.

dn8:14.5 So ekāgāriko vā hoti ekālopiko, dvāgāriko vā hoti dvālopiko … sattāgāriko vā hoti sattālopiko;

dn8:14.6 ekissāpi dattiyā yāpeti, dvīhipi dattīhi yāpeti … sattahipi dattīhi yāpeti;

dn8:14.7 ekāhikampi āhāraṁ āhāreti, dvīhikampi āhāraṁ āhāreti … sattāhikampi āhāraṁ āhāreti. Iti evarūpaṁ addhamāsikampi pariyāyabhattabhojanānuyogamanuyutto viharati.

dn8:14.8 Imepi kho, āvuso gotama, tapopakkamā etesaṁ samaṇabrāhmaṇānaṁ sāmaññasaṅkhātā ca brahmaññasaṅkhātā ca.

dn8:14.9 Sākabhakkho vā hoti, sāmākabhakkho vā hoti, nīvārabhakkho vā hoti, daddulabhakkho vā hoti, haṭabhakkho vā hoti, kaṇabhakkho vā hoti, ācāmabhakkho vā hoti, piññākabhakkho vā hoti, tiṇabhakkho vā hoti, gomayabhakkho vā hoti, vanamūlaphalāhāro yāpeti pavattaphalabhojī.

dn8:14.10 Imepi kho, āvuso gotama, tapopakkamā etesaṁ samaṇabrāhmaṇānaṁ sāmaññasaṅkhātā ca brahmaññasaṅkhātā ca.

dn8:14.11 Sāṇānipi dhāreti, masāṇānipi dhāreti, chavadussānipi dhāreti, paṁsukūlānipi dhāreti, tirīṭānipi dhāreti, ajinampi dhāreti, ajinakkhipampi dhāreti, kusacīrampi dhāreti, vākacīrampi dhāreti, phalakacīrampi dhāreti, kesakambalampi dhāreti, vāḷakambalampi dhāreti, ulūkapakkhikampi dhāreti,

dn8:14.12 kesamassulocakopi hoti kesamassulocanānuyogamanuyutto,

dn8:14.13 ubbhaṭṭhakopi hoti āsanapaṭikkhitto,

dn8:14.14 ukkuṭikopi hoti ukkuṭikappadhānamanuyutto,

dn8:14.15 kaṇṭakāpassayikopi hoti kaṇṭakāpassaye seyyaṁ kappeti,

dn8:14.16 phalakaseyyampi kappeti, thaṇḍilaseyyampi kappeti,

dn8:14.17 ekapassayikopi hoti

dn8:14.18 rajojalladharo,

dn8:14.19 abbhokāsikopi hoti

dn8:14.20 yathāsanthatiko,

dn8:14.21 vekaṭikopi hoti vikaṭabhojanānuyogamanuyutto,

dn8:14.22 apānakopi hoti apānakattamanuyutto,

dn8:14.23 sāyatatiyakampi udakorohanānuyogamanuyutto viharatī”ti.