dn25:8.1 Atha kho nigrodho paribbājako te paribbājake appasadde katvā bhagavantaṁ etadavoca:
BAGIAN 8
dn25:8.2 “mayaṁ kho, bhante, tapojigucchāvādā tapojigucchāsārā tapojigucchāallīnā viharāma.
dn25:8.3 Kathaṁ santā nu kho, bhante, tapojigucchā paripuṇṇā hoti, kathaṁ aparipuṇṇā”ti?
dn25:8.4 “Idha, nigrodha, tapassī acelako hoti muttācāro, hatthāpalekhano, naehibhaddantiko, natiṭṭhabhaddantiko, nābhihaṭaṁ, na uddissakataṁ, na nimantanaṁ sādiyati,
dn25:8.5 so na kumbhimukhā paṭiggaṇhāti, na kaḷopimukhā paṭiggaṇhāti, na eḷakamantaraṁ, na daṇḍamantaraṁ, na musalamantaraṁ, na dvinnaṁ bhuñjamānānaṁ, na gabbhiniyā, na pāyamānāya, na purisantaragatāya, na saṅkittīsu, na yattha sā upaṭṭhito hoti, na yattha makkhikā saṇḍasaṇḍacārinī, na macchaṁ, na maṁsaṁ, na suraṁ, na merayaṁ, na thusodakaṁ pivati,
dn25:8.6 so ekāgāriko vā hoti ekālopiko, dvāgāriko vā hoti dvālopiko, sattāgāriko vā hoti sattālopiko, ekissāpi dattiyā yāpeti, dvīhipi dattīhi yāpeti, sattahipi dattīhi yāpeti;
dn25:8.7 ekāhikampi āhāraṁ āhāreti, dvīhikampi āhāraṁ āhāreti, sattāhikampi āhāraṁ āhāreti, iti evarūpaṁ addhamāsikampi pariyāyabhattabhojanānuyogamanuyutto viharati.
dn25:8.8 So sākabhakkho vā hoti, sāmākabhakkho vā hoti, nīvārabhakkho vā hoti, daddulabhakkho vā hoti, haṭabhakkho vā hoti, kaṇabhakkho vā hoti, ācāmabhakkho vā hoti, piññākabhakkho vā hoti, tiṇabhakkho vā hoti, gomayabhakkho vā hoti; vanamūlaphalāhāro yāpeti pavattaphalabhojī.
dn25:8.9 So sāṇānipi dhāreti, masāṇānipi dhāreti, chavadussānipi dhāreti, paṁsukūlānipi dhāreti, tirīṭānipi dhāreti, ajinampi dhāreti, ajinakkhipampi dhāreti, kusacīrampi dhāreti, vākacīrampi dhāreti, phalakacīrampi dhāreti, kesakambalampi dhāreti, vāḷakambalampi dhāreti, ulūkapakkhampi dhāreti,
dn25:8.10 kesamassulocakopi hoti kesamassulocanānuyogamanuyutto,
dn25:8.11 ubbhaṭṭhakopi hoti āsanapaṭikkhitto,
dn25:8.12 ukkuṭikopi hoti ukkuṭikappadhānamanuyutto,
dn25:8.13 kaṇṭakāpassayikopi hoti kaṇṭakāpassaye seyyaṁ kappeti,
dn25:8.14 phalakaseyyampi kappeti, thaṇḍilaseyyampi kappeti,
dn25:8.15 ekapassayikopi hoti
dn25:8.16 rajojalladharo,
dn25:8.17 abbhokāsikopi hoti
dn25:8.18 yathāsanthatiko,
dn25:8.19 vekaṭikopi hoti vikaṭabhojanānuyogamanuyutto,
dn25:8.20 apānakopi hoti apānakattamanuyutto,
dn25:8.21 sāyatatiyakampi udakorohanānuyogamanuyutto viharati.
dn25:8.22 Taṁ kiṁ maññasi, nigrodha,
dn25:8.23 yadi evaṁ sante tapojigucchā paripuṇṇā vā hoti aparipuṇṇā vā”ti?
dn25:8.24 “Addhā kho, bhante, evaṁ sante tapojigucchā paripuṇṇā hoti, no aparipuṇṇā”ti.
dn25:8.25 “Evaṁ paripuṇṇāyapi kho ahaṁ, nigrodha, tapojigucchāya anekavihite upakkilese vadāmī”ti.