dn25:19.0 3. Parisuddhaaggappattasārappattakathā
BAGIAN 19
dn25:19.1 “Kittāvatā pana, bhante, tapojigucchā aggappattā ca hoti sārappattā ca?
dn25:19.2 Sādhu me, bhante, bhagavā tapojigucchāya aggaññeva pāpetu, sāraññeva pāpetū”ti.
dn25:19.3 “Idha, nigrodha, tapassī cātuyāmasaṁvarasaṁvuto hoti.
dn25:19.4 Kathañca, nigrodha, tapassī cātuyāmasaṁvarasaṁvuto hoti …pe…
dn25:19.5 yato kho, nigrodha, tapassī cātuyāmasaṁvarasaṁvuto hoti, aduṁ cassa hoti tapassitāya.
dn25:19.6 So abhiharati no hīnāyāvattati.
dn25:19.7 So vivittaṁ senāsanaṁ bhajati …pe…
dn25:19.8 so ime pañca nīvaraṇe pahāya cetaso upakkilese paññāya dubbalīkaraṇe
dn25:19.9 mettāsahagatena cetasā …pe…
dn25:19.10 upekkhāsahagatena cetasā vipulena mahaggatena appamāṇena averena abyāpajjena pharitvā viharati.
dn25:19.11 So anekavihitaṁ pubbenivāsaṁ anussarati. Seyyathidaṁ—ekampi jātiṁ dvepi jātiyo tissopi jātiyo catassopi jātiyo pañcapi jātiyo …pe… iti sākāraṁ sauddesaṁ anekavihitaṁ pubbenivāsaṁ anussarati.
dn25:19.12 So dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti: ‘ime vata bhonto sattā kāyaduccaritena samannāgatā vacīduccaritena samannāgatā manoduccaritena samannāgatā ariyānaṁ upavādakā micchādiṭṭhikā micchādiṭṭhikammasamādānā. Te kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā. Ime vā pana bhonto sattā kāyasucaritena samannāgatā vacīsucaritena samannāgatā manosucaritena samannāgatā ariyānaṁ anupavādakā sammādiṭṭhikā sammādiṭṭhikammasamādānā. Te kāyassa bhedā paraṁ maraṇā sugatiṁ saggaṁ lokaṁ upapannā’ti. Iti dibbena cakkhunā visuddhena atikkantamānusakena satte passati cavamāne upapajjamāne hīne paṇīte suvaṇṇe dubbaṇṇe sugate duggate, yathākammūpage satte pajānāti.
dn25:19.13 Taṁ kiṁ maññasi, nigrodha,
dn25:19.14 yadi evaṁ sante tapojigucchā parisuddhā vā hoti aparisuddhā vā”ti?
dn25:19.15 “Addhā kho, bhante, evaṁ sante tapojigucchā parisuddhā hoti no aparisuddhā, aggappattā ca sārappattā cā”ti.
dn25:19.16 “Ettāvatā kho, nigrodha, tapojigucchā aggappattā ca hoti sārappattā ca.
dn25:19.17 Iti kho, nigrodha, yaṁ maṁ tvaṁ avacāsi:
dn25:19.18 ‘ko nāma so, bhante, bhagavato dhammo, yena bhagavā sāvake vineti, yena bhagavatā sāvakā vinītā assāsappattā paṭijānanti ajjhāsayaṁ ādibrahmacariyan’ti.
dn25:19.19 Iti kho taṁ, nigrodha, ṭhānaṁ uttaritarañca paṇītatarañca, yenāhaṁ sāvake vinemi, yena mayā sāvakā vinītā assāsappattā paṭijānanti ajjhāsayaṁ ādibrahmacariyan”ti.
dn25:19.20 Evaṁ vutte, te paribbājakā unnādino uccāsaddamahāsaddā ahesuṁ:
dn25:19.21 “ettha mayaṁ anassāma sācariyakā, na mayaṁ ito bhiyyo uttaritaraṁ pajānāmā”ti.