Pāthikasutta

dn24:1.0 1. Sunakkhattavatthu

dn24:1.1.1 Evaṁ me sutaṁ—

dn24:1.1.2 ekaṁ samayaṁ bhagavā mallesu viharati anupiyaṁ nāma mallānaṁ nigamo.

dn24:1.1.3 Atha kho bhagavā pubbaṇhasamayaṁ nivāsetvā pattacīvaramādāya anupiyaṁ piṇḍāya pāvisi.

dn24:1.1.4 Atha kho bhagavato etadahosi:

dn24:1.1.5 “atippago kho tāva anupiyāyaṁ piṇḍāya carituṁ.

dn24:1.1.6 Yannūnāhaṁ yena bhaggavagottassa paribbājakassa ārāmo, yena bhaggavagotto paribbājako tenupasaṅkameyyan”ti.

dn24:1.2.1 Atha kho bhagavā yena bhaggavagottassa paribbājakassa ārāmo, yena bhaggavagotto paribbājako tenupasaṅkami.

dn24:1.2.2 Atha kho bhaggavagotto paribbājako bhagavantaṁ etadavoca:

dn24:1.2.3 “etu kho, bhante, bhagavā.

dn24:1.2.4 Svāgataṁ, bhante, bhagavato.

dn24:1.2.5 Cirassaṁ kho, bhante, bhagavā imaṁ pariyāyamakāsi yadidaṁ idhāgamanāya.

dn24:1.2.6 Nisīdatu, bhante, bhagavā, idamāsanaṁ paññattan”ti.

dn24:1.2.7 Nisīdi bhagavā paññatte āsane.

dn24:1.2.8 Bhaggavagottopi kho paribbājako aññataraṁ nīcaṁ āsanaṁ gahetvā ekamantaṁ nisīdi.

dn24:1.2.9 Ekamantaṁ nisinno kho bhaggavagotto paribbājako bhagavantaṁ etadavoca:

dn24:1.2.10 “purimāni, bhante, divasāni purimatarāni sunakkhatto licchaviputto yenāhaṁ tenupasaṅkami; upasaṅkamitvā maṁ etadavoca:

dn24:1.2.11 ‘paccakkhāto dāni mayā, bhaggava, bhagavā.

dn24:1.2.12 Na dānāhaṁ bhagavantaṁ uddissa viharāmī’ti.

dn24:1.2.13 Kaccetaṁ, bhante, tatheva, yathā sunakkhatto licchaviputto avacā”ti?

dn24:1.2.14 “Tatheva kho etaṁ, bhaggava, yathā sunakkhatto licchaviputto avaca.

dn24:1.3.1 Purimāni, bhaggava, divasāni purimatarāni sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinno kho, bhaggava, sunakkhatto licchaviputto maṁ etadavoca:

dn24:1.3.2 ‘paccakkhāmi dānāhaṁ, bhante, bhagavantaṁ.

dn24:1.3.3 Na dānāhaṁ, bhante, bhagavantaṁ uddissa viharissāmī’ti.

dn24:1.3.4 Evaṁ vutte, ahaṁ, bhaggava, sunakkhattaṁ licchaviputtaṁ etadavocaṁ:

dn24:1.3.5 ‘api nu tāhaṁ, sunakkhatta, evaṁ avacaṁ,

dn24:1.3.6 ehi tvaṁ, sunakkhatta, mamaṁ uddissa viharāhī’ti?

dn24:1.3.7 ‘No hetaṁ, bhante’.

dn24:1.3.8 ‘Tvaṁ vā pana maṁ evaṁ avaca—

dn24:1.3.9 ahaṁ, bhante, bhagavantaṁ uddissa viharissāmī’ti?

dn24:1.3.10 ‘No hetaṁ, bhante’.

dn24:1.3.11 ‘Iti kira, sunakkhatta, nevāhaṁ taṁ vadāmi—

dn24:1.3.12 ehi tvaṁ, sunakkhatta, mamaṁ uddissa viharāhīti.

dn24:1.3.13 Napi kira maṁ tvaṁ vadesi—

dn24:1.3.14 ahaṁ, bhante, bhagavantaṁ uddissa viharissāmīti.

dn24:1.3.15 Evaṁ sante, moghapurisa, ko santo kaṁ paccācikkhasi?

dn24:1.3.16 Passa, moghapurisa, yāvañca te idaṁ aparaddhan’ti.

dn24:1.4.1 ‘Na hi pana me, bhante, bhagavā uttari manussadhammā iddhipāṭihāriyaṁ karotī’ti.

dn24:1.4.2 ‘Api nu tāhaṁ, sunakkhatta, evaṁ avacaṁ—

dn24:1.4.3 ehi tvaṁ, sunakkhatta, mamaṁ uddissa viharāhi, ahaṁ te uttari manussadhammā iddhipāṭihāriyaṁ karissāmī’ti?

dn24:1.4.4 ‘No hetaṁ, bhante’.

dn24:1.4.5 ‘Tvaṁ vā pana maṁ evaṁ avaca—

dn24:1.4.6 ahaṁ, bhante, bhagavantaṁ uddissa viharissāmi, bhagavā me uttari manussadhammā iddhipāṭihāriyaṁ karissatī’ti?

dn24:1.4.7 ‘No hetaṁ, bhante’.

dn24:1.4.8 ‘Iti kira, sunakkhatta, nevāhaṁ taṁ vadāmi—

dn24:1.4.9 ehi tvaṁ, sunakkhatta, mamaṁ uddissa viharāhi, ahaṁ te uttari manussadhammā iddhipāṭihāriyaṁ karissāmīti;

dn24:1.4.10 napi kira maṁ tvaṁ vadesi—

dn24:1.4.11 ahaṁ, bhante, bhagavantaṁ uddissa viharissāmi, bhagavā me uttari manussadhammā iddhipāṭihāriyaṁ karissatīti.

dn24:1.4.12 Evaṁ sante, moghapurisa, ko santo kaṁ paccācikkhasi?

dn24:1.4.13 Taṁ kiṁ maññasi, sunakkhatta,

dn24:1.4.14 kate vā uttari manussadhammā iddhipāṭihāriye akate vā uttari manussadhammā iddhipāṭihāriye yassatthāya mayā dhammo desito so niyyāti takkarassa sammā dukkhakkhayāyā’ti?

dn24:1.4.15 ‘Kate vā, bhante, uttari manussadhammā iddhipāṭihāriye akate vā uttari manussadhammā iddhipāṭihāriye yassatthāya bhagavatā dhammo desito so niyyāti takkarassa sammā dukkhakkhayāyā’ti.

dn24:1.4.16 ‘Iti kira, sunakkhatta, kate vā uttari manussadhammā iddhipāṭihāriye, akate vā uttari manussadhammā iddhipāṭihāriye, yassatthāya mayā dhammo desito, so niyyāti takkarassa sammā dukkhakkhayāya.

dn24:1.4.17 Tatra, sunakkhatta, kiṁ uttari manussadhammā iddhipāṭihāriyaṁ kataṁ karissati?

dn24:1.4.18 Passa, moghapurisa, yāvañca te idaṁ aparaddhan’ti.

dn24:1.5.1 ‘Na hi pana me, bhante, bhagavā aggaññaṁ paññapetī’ti?

dn24:1.5.2 ‘Api nu tāhaṁ, sunakkhatta, evaṁ avacaṁ—

dn24:1.5.3 ehi tvaṁ, sunakkhatta, mamaṁ uddissa viharāhi, ahaṁ te aggaññaṁ paññapessāmī’ti?

dn24:1.5.4 ‘No hetaṁ, bhante’.

dn24:1.5.5 ‘Tvaṁ vā pana maṁ evaṁ avaca—

dn24:1.5.6 ahaṁ, bhante, bhagavantaṁ uddissa viharissāmi, bhagavā me aggaññaṁ paññapessatī’ti?

dn24:1.5.7 ‘No hetaṁ, bhante’.

dn24:1.5.8 ‘Iti kira, sunakkhatta, nevāhaṁ taṁ vadāmi—

dn24:1.5.9 ehi tvaṁ, sunakkhatta, mamaṁ uddissa viharāhi, ahaṁ te aggaññaṁ paññapessāmīti.

dn24:1.5.10 Napi kira maṁ tvaṁ vadesi—

dn24:1.5.11 ahaṁ, bhante, bhagavantaṁ uddissa viharissāmi, bhagavā me aggaññaṁ paññapessatīti.

dn24:1.5.12 Evaṁ sante, moghapurisa, ko santo kaṁ paccācikkhasi?

dn24:1.5.13 Taṁ kiṁ maññasi, sunakkhatta,

dn24:1.5.14 paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāyā’ti?

dn24:1.5.15 ‘Paññatte vā, bhante, aggaññe, apaññatte vā aggaññe, yassatthāya bhagavatā dhammo desito, so niyyāti takkarassa sammā dukkhakkhayāyā’ti.

dn24:1.5.16 ‘Iti kira, sunakkhatta, paññatte vā aggaññe, apaññatte vā aggaññe, yassatthāya mayā dhammo desito, so niyyāti takkarassa sammā dukkhakkhayāya.

dn24:1.5.17 Tatra, sunakkhatta, kiṁ aggaññaṁ paññattaṁ karissati?

dn24:1.5.18 Passa, moghapurisa, yāvañca te idaṁ aparaddhaṁ.

dn24:1.6.1 Anekapariyāyena kho te, sunakkhatta, mama vaṇṇo bhāsito vajjigāme—

dn24:1.6.2 itipi so bhagavā arahaṁ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṁ buddho bhagavāti.

dn24:1.6.3 Iti kho te, sunakkhatta, anekapariyāyena mama vaṇṇo bhāsito vajjigāme.

dn24:1.6.4 Anekapariyāyena kho te, sunakkhatta, dhammassa vaṇṇo bhāsito vajjigāme—

dn24:1.6.5 svākkhāto bhagavatā dhammo sandiṭṭhiko akāliko ehipassiko opaneyyiko paccattaṁ veditabbo viññūhīti.

dn24:1.6.6 Iti kho te, sunakkhatta, anekapariyāyena dhammassa vaṇṇo bhāsito vajjigāme.

dn24:1.6.7 Anekapariyāyena kho te, sunakkhatta, saṅghassa vaṇṇo bhāsito vajjigāme—

dn24:1.6.8 suppaṭipanno bhagavato sāvakasaṅgho, ujuppaṭipanno bhagavato sāvakasaṅgho, ñāyappaṭipanno bhagavato sāvakasaṅgho, sāmīcippaṭipanno bhagavato sāvakasaṅgho, yadidaṁ cattāri purisayugāni aṭṭha purisapuggalā, esa bhagavato sāvakasaṅgho, āhuneyyo pāhuneyyo dakkhiṇeyyo añjalikaraṇīyo anuttaraṁ puññakkhettaṁ lokassāti.

dn24:1.6.9 Iti kho te, sunakkhatta, anekapariyāyena saṅghassa vaṇṇo bhāsito vajjigāme.

dn24:1.6.10 Ārocayāmi kho te, sunakkhatta, paṭivedayāmi kho te, sunakkhatta.

dn24:1.6.11 Bhavissanti kho te, sunakkhatta, vattāro, no visahi sunakkhatto licchaviputto samaṇe gotame brahmacariyaṁ carituṁ, so avisahanto sikkhaṁ paccakkhāya hīnāyāvattoti.

dn24:1.6.12 Iti kho te, sunakkhatta, bhavissanti vattāro’ti.

dn24:1.6.13 Evaṁ kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṁ āpāyiko nerayiko.

dn24:1.7.0 2. Korakkhattiyavatthu

dn24:1.7.1 Ekamidāhaṁ, bhaggava, samayaṁ thūlūsu viharāmi uttarakā nāma thūlūnaṁ nigamo.

dn24:1.7.2 Atha khvāhaṁ, bhaggava, pubbaṇhasamayaṁ nivāsetvā pattacīvaramādāya sunakkhattena licchaviputtena pacchāsamaṇena uttarakaṁ piṇḍāya pāvisiṁ.

dn24:1.7.3 Tena kho pana samayena acelo korakkhattiyo kukkuravatiko catukkuṇḍiko chamānikiṇṇaṁ bhakkhasaṁ mukheneva khādati, mukheneva bhuñjati.

dn24:1.7.4 Addasā kho, bhaggava, sunakkhatto licchaviputto acelaṁ korakkhattiyaṁ kukkuravatikaṁ catukkuṇḍikaṁ chamānikiṇṇaṁ bhakkhasaṁ mukheneva khādantaṁ mukheneva bhuñjantaṁ.

dn24:1.7.5 Disvānassa etadahosi:

dn24:1.7.6 ‘sādhurūpo vata bho ayaṁ samaṇo catukkuṇḍiko chamānikiṇṇaṁ bhakkhasaṁ mukheneva khādati, mukheneva bhuñjatī’ti.

dn24:1.7.7 Atha khvāhaṁ, bhaggava, sunakkhattassa licchaviputtassa cetasā cetoparivitakkamaññāya sunakkhattaṁ licchaviputtaṁ etadavocaṁ:

dn24:1.7.8 ‘tvampi nāma, moghapurisa, samaṇo sakyaputtiyo paṭijānissasī’ti.

dn24:1.7.9 ‘Kiṁ pana maṁ, bhante, bhagavā evamāha:

dn24:1.7.10 “tvampi nāma, moghapurisa, samaṇo sakyaputtiyo paṭijānissasī”’ti?

dn24:1.7.11 ‘Nanu te, sunakkhatta, imaṁ acelaṁ korakkhattiyaṁ kukkuravatikaṁ catukkuṇḍikaṁ chamānikiṇṇaṁ bhakkhasaṁ mukheneva khādantaṁ mukheneva bhuñjantaṁ disvāna etadahosi—

dn24:1.7.12 sādhurūpo vata bho ayaṁ samaṇo catukkuṇḍiko chamānikiṇṇaṁ bhakkhasaṁ mukheneva khādati, mukheneva bhuñjatī’ti?

dn24:1.7.13 ‘Evaṁ, bhante.

dn24:1.7.14 Kiṁ pana, bhante, bhagavā arahattassa maccharāyatī’ti?

dn24:1.7.15 ‘Na kho ahaṁ, moghapurisa, arahattassa maccharāyāmi.

dn24:1.7.16 Api ca tuyhevetaṁ pāpakaṁ diṭṭhigataṁ uppannaṁ, taṁ pajaha.

dn24:1.7.17 Mā te ahosi dīgharattaṁ ahitāya dukkhāya.

dn24:1.7.18 Yaṁ kho panetaṁ, sunakkhatta, maññasi acelaṁ korakkhattiyaṁ—sādhurūpo ayaṁ samaṇoti. So sattamaṁ divasaṁ alasakena kālaṁ karissati.

dn24:1.7.19 Kālaṅkato ca kālakañcikā nāma asurā sabbanihīno asurakāyo, tatra upapajjissati.

dn24:1.7.20 Kālaṅkatañca naṁ bīraṇatthambake susāne chaḍḍessanti.

dn24:1.7.21 Ākaṅkhamāno ca tvaṁ, sunakkhatta, acelaṁ korakkhattiyaṁ upasaṅkamitvā puccheyyāsi—

dn24:1.7.22 jānāsi, āvuso korakkhattiya, attano gatinti?

dn24:1.7.23 Ṭhānaṁ kho panetaṁ, sunakkhatta, vijjati yaṁ te acelo korakkhattiyo byākarissati—

dn24:1.7.24 jānāmi, āvuso sunakkhatta, attano gatiṁ;

dn24:1.7.25 kālakañcikā nāma asurā sabbanihīno asurakāyo, tatrāmhi upapanno’ti.

dn24:1.8.1 Atha kho, bhaggava, sunakkhatto licchaviputto yena acelo korakkhattiyo tenupasaṅkami; upasaṅkamitvā acelaṁ korakkhattiyaṁ etadavoca:

dn24:1.8.2 ‘byākato khosi, āvuso korakkhattiya, samaṇena gotamena—

dn24:1.8.3 acelo korakkhattiyo sattamaṁ divasaṁ alasakena kālaṁ karissati.

dn24:1.8.4 Kālaṅkato ca kālakañcikā nāma asurā sabbanihīno asurakāyo, tatra upapajjissati.

dn24:1.8.5 Kālaṅkatañca naṁ bīraṇatthambake susāne chaḍḍessantīti.

dn24:1.8.6 Yena tvaṁ, āvuso korakkhattiya, mattaṁ mattañca bhattaṁ bhuñjeyyāsi, mattaṁ mattañca pānīyaṁ piveyyāsi.

dn24:1.8.7 Yathā samaṇassa gotamassa micchā assa vacanan’ti.

dn24:1.8.8 Atha kho, bhaggava, sunakkhatto licchaviputto ekadvīhikāya sattarattindivāni gaṇesi, yathā taṁ tathāgatassa asaddahamāno.

dn24:1.8.9 Atha kho, bhaggava, acelo korakkhattiyo sattamaṁ divasaṁ alasakena kālamakāsi.

dn24:1.8.10 kālaṅkato ca kālakañcikā nāma asurā sabbanihīno asurakāyo, tatra upapajji.

dn24:1.8.11 kālaṅkatañca naṁ bīraṇatthambake susāne chaḍḍesuṁ.

dn24:1.9.1 Assosi kho, bhaggava, sunakkhatto licchaviputto:

dn24:1.9.2 ‘acelo kira korakkhattiyo alasakena kālaṅkato bīraṇatthambake susāne chaḍḍito’ti.

dn24:1.9.3 Atha kho, bhaggava, sunakkhatto licchaviputto yena bīraṇatthambakaṁ susānaṁ, yena acelo korakkhattiyo tenupasaṅkami; upasaṅkamitvā acelaṁ korakkhattiyaṁ tikkhattuṁ pāṇinā ākoṭesi:

dn24:1.9.4 ‘jānāsi, āvuso korakkhattiya, attano gatin’ti?

dn24:1.9.5 Atha kho, bhaggava, acelo korakkhattiyo pāṇinā piṭṭhiṁ paripuñchanto vuṭṭhāsi.

dn24:1.9.6 ‘Jānāmi, āvuso sunakkhatta, attano gatiṁ.

dn24:1.9.7 Kālakañcikā nāma asurā sabbanihīno asurakāyo, tatrāmhi upapanno’ti vatvā tattheva uttāno papati.

dn24:1.10.1 Atha kho, bhaggava, sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnaṁ kho ahaṁ, bhaggava, sunakkhattaṁ licchaviputtaṁ etadavocaṁ:

dn24:1.10.2 ‘Taṁ kiṁ maññasi, sunakkhatta,

dn24:1.10.3 yatheva te ahaṁ acelaṁ korakkhattiyaṁ ārabbha byākāsiṁ, tatheva taṁ vipākaṁ, aññathā vā’ti?

dn24:1.10.4 ‘Yatheva me, bhante, bhagavā acelaṁ korakkhattiyaṁ ārabbha byākāsi, tatheva taṁ vipākaṁ, no aññathā’ti.

dn24:1.10.5 ‘Taṁ kiṁ maññasi, sunakkhatta,

dn24:1.10.6 yadi evaṁ sante kataṁ vā hoti uttari manussadhammā iddhipāṭihāriyaṁ, akataṁ vā’ti?

dn24:1.10.7 ‘Addhā kho, bhante, evaṁ sante kataṁ hoti uttari manussadhammā iddhipāṭihāriyaṁ, no akatan’ti.

dn24:1.10.8 ‘Evampi kho maṁ tvaṁ, moghapurisa, uttari manussadhammā iddhipāṭihāriyaṁ karontaṁ evaṁ vadesi—

dn24:1.10.9 na hi pana me, bhante, bhagavā uttari manussadhammā iddhipāṭihāriyaṁ karotīti.

dn24:1.10.10 Passa, moghapurisa, yāvañca te idaṁ aparaddhan’ti.

dn24:1.10.11 Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṁ āpāyiko nerayiko.

dn24:1.11.0 3. Acelakaḷāramaṭṭakavatthu

dn24:1.11.1 Ekamidāhaṁ, bhaggava, samayaṁ vesāliyaṁ viharāmi mahāvane kūṭāgārasālāyaṁ.

dn24:1.11.2 Tena kho pana samayena acelo kaḷāramaṭṭako vesāliyaṁ paṭivasati lābhaggappatto ceva yasaggappatto ca vajjigāme.

dn24:1.11.3 Tassa sattavatapadāni samattāni samādinnāni honti:

dn24:1.11.4 ‘yāvajīvaṁ acelako assaṁ, na vatthaṁ paridaheyyaṁ, yāvajīvaṁ brahmacārī assaṁ, na methunaṁ dhammaṁ paṭiseveyyaṁ, yāvajīvaṁ surāmaṁseneva yāpeyyaṁ, na odanakummāsaṁ bhuñjeyyaṁ.

dn24:1.11.5 Puratthimena vesāliṁ udenaṁ nāma cetiyaṁ, taṁ nātikkameyyaṁ, dakkhiṇena vesāliṁ gotamakaṁ nāma cetiyaṁ, taṁ nātikkameyyaṁ, pacchimena vesāliṁ sattambaṁ nāma cetiyaṁ, taṁ nātikkameyyaṁ, uttarena vesāliṁ bahuputtaṁ nāma cetiyaṁ taṁ nātikkameyyan’ti.

dn24:1.11.6 So imesaṁ sattannaṁ vatapadānaṁ samādānahetu lābhaggappatto ceva yasaggappatto ca vajjigāme.

dn24:1.12.1 Atha kho, bhaggava, sunakkhatto licchaviputto yena acelo kaḷāramaṭṭako tenupasaṅkami; upasaṅkamitvā acelaṁ kaḷāramaṭṭakaṁ pañhaṁ apucchi.

dn24:1.12.2 Tassa acelo kaḷāramaṭṭako pañhaṁ puṭṭho na sampāyāsi.

dn24:1.12.3 Asampāyanto kopañca dosañca appaccayañca pātvākāsi.

dn24:1.12.4 Atha kho, bhaggava, sunakkhattassa licchaviputtassa etadahosi:

dn24:1.12.5 ‘sādhurūpaṁ vata bho arahantaṁ samaṇaṁ āsādimhase.

dn24:1.12.6 Mā vata no ahosi dīgharattaṁ ahitāya dukkhāyā’ti.

dn24:1.13.1 Atha kho, bhaggava, sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnaṁ kho ahaṁ, bhaggava, sunakkhattaṁ licchaviputtaṁ etadavocaṁ:

dn24:1.13.2 ‘tvampi nāma, moghapurisa, samaṇo sakyaputtiyo paṭijānissasī’ti.

dn24:1.13.3 ‘Kiṁ pana maṁ, bhante, bhagavā evamāha—

dn24:1.13.4 tvampi nāma, moghapurisa, samaṇo sakyaputtiyo paṭijānissasī’ti?

dn24:1.13.5 ‘Nanu tvaṁ, sunakkhatta, acelaṁ kaḷāramaṭṭakaṁ upasaṅkamitvā pañhaṁ apucchi.

dn24:1.13.6 Tassa te acelo kaḷāramaṭṭako pañhaṁ puṭṭho na sampāyāsi.

dn24:1.13.7 Asampāyanto kopañca dosañca appaccayañca pātvākāsi.

dn24:1.13.8 Tassa te etadahosi:

dn24:1.13.9 “sādhurūpaṁ vata bho arahantaṁ samaṇaṁ āsādimhase.

dn24:1.13.10 Mā vata no ahosi dīgharattaṁ ahitāya dukkhāyā”’ti.

dn24:1.13.11 ‘Evaṁ, bhante.

dn24:1.13.12 Kiṁ pana, bhante, bhagavā arahattassa maccharāyatī’ti?

dn24:1.13.13 ‘Na kho ahaṁ, moghapurisa, arahattassa maccharāyāmi,

dn24:1.13.14 api ca tuyhevetaṁ pāpakaṁ diṭṭhigataṁ uppannaṁ, taṁ pajaha.

dn24:1.13.15 Mā te ahosi dīgharattaṁ ahitāya dukkhāya.

dn24:1.13.16 Yaṁ kho panetaṁ, sunakkhatta, maññasi acelaṁ kaḷāramaṭṭakaṁ—

dn24:1.13.17 sādhurūpo ayaṁ samaṇoti, so nacirasseva parihito sānucāriko vicaranto odanakummāsaṁ bhuñjamāno sabbāneva vesāliyāni cetiyāni samatikkamitvā yasā nihīno kālaṁ karissatī’ti.

dn24:1.13.18 Atha kho, bhaggava, acelo kaḷāramaṭṭako nacirasseva parihito sānucāriko vicaranto odanakummāsaṁ bhuñjamāno sabbāneva vesāliyāni cetiyāni samatikkamitvā yasā nihīno kālamakāsi.

dn24:1.14.1 Assosi kho, bhaggava, sunakkhatto licchaviputto:

dn24:1.14.2 ‘acelo kira kaḷāramaṭṭako parihito sānucāriko vicaranto odanakummāsaṁ bhuñjamāno sabbāneva vesāliyāni cetiyāni samatikkamitvā yasā nihīno kālaṅkato’ti.

dn24:1.14.3 Atha kho, bhaggava, sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinnaṁ kho ahaṁ, bhaggava, sunakkhattaṁ licchaviputtaṁ etadavocaṁ:

dn24:1.14.4 ‘Taṁ kiṁ maññasi, sunakkhatta,

dn24:1.14.5 yatheva te ahaṁ acelaṁ kaḷāramaṭṭakaṁ ārabbha byākāsiṁ, tatheva taṁ vipākaṁ, aññathā vā’ti?

dn24:1.14.6 ‘Yatheva me, bhante, bhagavā acelaṁ kaḷāramaṭṭakaṁ ārabbha byākāsi, tatheva taṁ vipākaṁ, no aññathā’ti.

dn24:1.14.7 ‘Taṁ kiṁ maññasi, sunakkhatta,

dn24:1.14.8 yadi evaṁ sante kataṁ vā hoti uttari manussadhammā iddhipāṭihāriyaṁ akataṁ vā’ti?

dn24:1.14.9 ‘Addhā kho, bhante, evaṁ sante kataṁ hoti uttari manussadhammā iddhipāṭihāriyaṁ, no akatan’ti.

dn24:1.14.10 ‘Evampi kho maṁ tvaṁ, moghapurisa, uttari manussadhammā iddhipāṭihāriyaṁ karontaṁ evaṁ vadesi:

dn24:1.14.11 “na hi pana me, bhante, bhagavā uttari manussadhammā iddhipāṭihāriyaṁ karotī”ti.

dn24:1.14.12 Passa, moghapurisa, yāvañca te idaṁ aparaddhan’ti.

dn24:1.14.13 Evampi kho, bhaggava, sunakkhatto licchaviputto mayā vuccamāno apakkameva imasmā dhammavinayā, yathā taṁ āpāyiko nerayiko.

dn24:1.15.0 4. Acelapāthikaputtavatthu

dn24:1.15.1 Ekamidāhaṁ, bhaggava, samayaṁ tattheva vesāliyaṁ viharāmi mahāvane kūṭāgārasālāyaṁ.

dn24:1.15.2 Tena kho pana samayena acelo pāthikaputto vesāliyaṁ paṭivasati lābhaggappatto ceva yasaggappatto ca vajjigāme.

dn24:1.15.3 So vesāliyaṁ parisati evaṁ vācaṁ bhāsati:

dn24:1.15.4 ‘samaṇopi gotamo ñāṇavādo, ahampi ñāṇavādo.

dn24:1.15.5 Ñāṇavādo kho pana ñāṇavādena arahati uttari manussadhammā iddhipāṭihāriyaṁ dassetuṁ.

dn24:1.15.6 Samaṇo gotamo upaḍḍhapathaṁ āgaccheyya, ahampi upaḍḍhapathaṁ gaccheyyaṁ.

dn24:1.15.7 Te tattha ubhopi uttari manussadhammā iddhipāṭihāriyaṁ kareyyāma.

dn24:1.15.8 Ekañce samaṇo gotamo uttari manussadhammā iddhipāṭihāriyaṁ karissati, dvāhaṁ karissāmi.

dn24:1.15.9 Dve ce samaṇo gotamo uttari manussadhammā iddhipāṭihāriyāni karissati, cattārāhaṁ karissāmi.

dn24:1.15.10 Cattāri ce samaṇo gotamo uttari manussadhammā iddhipāṭihāriyāni karissati, aṭṭhāhaṁ karissāmi.

dn24:1.15.11 Iti yāvatakaṁ yāvatakaṁ samaṇo gotamo uttari manussadhammā iddhipāṭihāriyaṁ karissati, taddiguṇaṁ taddiguṇāhaṁ karissāmī’ti.

dn24:1.16.1 Atha kho, bhaggava, sunakkhatto licchaviputto yenāhaṁ tenupasaṅkami; upasaṅkamitvā maṁ abhivādetvā ekamantaṁ nisīdi. Ekamantaṁ nisinno kho, bhaggava, sunakkhatto licchaviputto maṁ etadavoca:

dn24:1.16.2 ‘acelo, bhante, pāthikaputto vesāliyaṁ paṭivasati lābhaggappatto ceva yasaggappatto ca vajjigāme.

dn24:1.16.3 So vesāliyaṁ parisati evaṁ vācaṁ bhāsati:

dn24:1.16.4 “samaṇopi gotamo ñāṇavādo, ahampi ñāṇavādo.

dn24:1.16.5 Ñāṇavādo kho pana ñāṇavādena arahati uttari manussadhammā iddhipāṭihāriyaṁ dassetuṁ.

dn24:1.16.6 Samaṇo gotamo upaḍḍhapathaṁ āgaccheyya, ahampi upaḍḍhapathaṁ gaccheyyaṁ.

dn24:1.16.7 Te tattha ubhopi uttari manussadhammā iddhipāṭihāriyaṁ kareyyāma.

dn24:1.16.8 Ekañce samaṇo gotamo uttari manussadhammā iddhipāṭihāriyaṁ karissati, dvāhaṁ karissāmi.

dn24:1.16.9 Dve ce samaṇo gotamo uttari manussadhammā iddhipāṭihāriyāni karissati, cattārāhaṁ karissāmi.

dn24:1.16.10 Cattāri ce samaṇo gotamo uttari manussadhammā iddhipāṭihāriyāni karissati, aṭṭhāhaṁ karissāmi.

dn24:1.16.11 Iti yāvatakaṁ yāvatakaṁ samaṇo gotamo uttari manussadhammā iddhipāṭihāriyaṁ karissati, taddiguṇaṁ taddiguṇāhaṁ karissāmī”’ti.

dn24:1.16.12 Evaṁ vutte, ahaṁ, bhaggava, sunakkhattaṁ licchaviputtaṁ etadavocaṁ:

dn24:1.16.13 ‘abhabbo kho, sunakkhatta, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.16.14 Sacepissa evamassa—

dn24:1.16.15 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyā’ti.

dn24:1.17.1 ‘Rakkhatetaṁ, bhante, bhagavā vācaṁ, rakkhatetaṁ sugato vācan’ti.

dn24:1.17.2 ‘Kiṁ pana maṁ tvaṁ, sunakkhatta, evaṁ vadesi—

dn24:1.17.3 rakkhatetaṁ, bhante, bhagavā vācaṁ, rakkhatetaṁ sugato vācan’ti?

dn24:1.17.4 ‘Bhagavatā cassa, bhante, esā vācā ekaṁsena odhāritā—

dn24:1.17.5 abhabbo acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.17.6 Sacepissa evamassa—

dn24:1.17.7 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.17.8 Acelo ca, bhante, pāthikaputto virūparūpena bhagavato sammukhībhāvaṁ āgaccheyya, tadassa bhagavato musā’ti.

dn24:1.18.1 ‘Api nu, sunakkhatta, tathāgato taṁ vācaṁ bhāseyya yā sā vācā dvayagāminī’ti?

dn24:1.18.2 ‘Kiṁ pana, bhante, bhagavatā acelo pāthikaputto cetasā ceto paricca vidito—

dn24:1.18.3 abhabbo acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.18.4 Sacepissa evamassa—

dn24:1.18.5 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti?

dn24:1.18.6 Udāhu, devatā bhagavato etamatthaṁ ārocesuṁ—

dn24:1.18.7 abhabbo, bhante, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā bhagavato sammukhībhāvaṁ āgantuṁ.

dn24:1.18.8 Sacepissa evamassa—

dn24:1.18.9 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyā’ti?

dn24:1.18.10 ‘Cetasā ceto paricca vidito ceva me, sunakkhatta, acelo pāthikaputto—

dn24:1.18.11 abhabbo acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.18.12 Sacepissa evamassa—

dn24:1.18.13 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.18.14 Devatāpi me etamatthaṁ ārocesuṁ—

dn24:1.18.15 abhabbo, bhante, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā bhagavato sammukhībhāvaṁ āgantuṁ.

dn24:1.18.16 Sacepissa evamassa—

dn24:1.18.17 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.18.18 Ajitopi nāma licchavīnaṁ senāpati adhunā kālaṅkato tāvatiṁsakāyaṁ upapanno.

dn24:1.18.19 Sopi maṁ upasaṅkamitvā evamārocesi—

dn24:1.18.20 alajjī, bhante, acelo pāthikaputto;

dn24:1.18.21 musāvādī, bhante, acelo pāthikaputto.

dn24:1.18.22 Mampi, bhante, acelo pāthikaputto byākāsi vajjigāme—

dn24:1.18.23 ajito licchavīnaṁ senāpati mahānirayaṁ upapannoti.

dn24:1.18.24 Na kho panāhaṁ, bhante, mahānirayaṁ upapanno;

dn24:1.18.25 tāvatiṁsakāyamhi upapanno.

dn24:1.18.26 Alajjī, bhante, acelo pāthikaputto;

dn24:1.18.27 musāvādī, bhante, acelo pāthikaputto;

dn24:1.18.28 abhabbo ca, bhante, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā bhagavato sammukhībhāvaṁ āgantuṁ.

dn24:1.18.29 Sacepissa evamassa—

dn24:1.18.30 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.18.31 Iti kho, sunakkhatta, cetasā ceto paricca vidito ceva me acelo pāthikaputto abhabbo acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.18.32 Sacepissa evamassa—

dn24:1.18.33 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.18.34 Devatāpi me etamatthaṁ ārocesuṁ—

dn24:1.18.35 abhabbo, bhante, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā bhagavato sammukhībhāvaṁ āgantuṁ.

dn24:1.18.36 Sacepissa evamassa—

dn24:1.18.37 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyāti.

dn24:1.18.38 So kho panāhaṁ, sunakkhatta, vesāliyaṁ piṇḍāya caritvā pacchābhattaṁ piṇḍapātapaṭikkanto yena acelassa pāthikaputtassa ārāmo tenupasaṅkamissāmi divāvihārāya.

dn24:1.18.39 Yassadāni tvaṁ, sunakkhatta, icchasi, tassa ārocehī’ti.

dn24:1.19.0 5. Iddhipāṭihāriyakathā

dn24:1.19.1 Atha khvāhaṁ, bhaggava, pubbaṇhasamayaṁ nivāsetvā pattacīvaramādāya vesāliṁ piṇḍāya pāvisiṁ.

dn24:1.19.2 Vesāliyaṁ piṇḍāya caritvā pacchābhattaṁ piṇḍapātapaṭikkanto yena acelassa pāthikaputtassa ārāmo tenupasaṅkamiṁ divāvihārāya.

dn24:1.19.3 Atha kho, bhaggava, sunakkhatto licchaviputto taramānarūpo vesāliṁ pavisitvā yena abhiññātā abhiññātā licchavī tenupasaṅkami; upasaṅkamitvā abhiññāte abhiññāte licchavī etadavoca:

dn24:1.19.4 ‘esāvuso, bhagavā vesāliyaṁ piṇḍāya caritvā pacchābhattaṁ piṇḍapātapaṭikkanto yena acelassa pāthikaputtassa ārāmo tenupasaṅkami divāvihārāya.

dn24:1.19.5 Abhikkamathāyasmanto abhikkamathāyasmanto, sādhurūpānaṁ samaṇānaṁ uttari manussadhammā iddhipāṭihāriyaṁ bhavissatī’ti.

dn24:1.19.6 Atha kho, bhaggava, abhiññātānaṁ abhiññātānaṁ licchavīnaṁ etadahosi:

dn24:1.19.7 ‘sādhurūpānaṁ kira, bho, samaṇānaṁ uttari manussadhammā iddhipāṭihāriyaṁ bhavissati;

dn24:1.19.8 handa vata, bho, gacchāmā’ti.

dn24:1.19.9 Yena ca abhiññātā abhiññātā brāhmaṇamahāsālā gahapatinecayikā nānātitthiyā samaṇabrāhmaṇā tenupasaṅkami. upasaṅkamitvā abhiññāte abhiññāte nānātitthiye samaṇabrāhmaṇe etadavoca:

dn24:1.19.10 ‘esāvuso, bhagavā vesāliyaṁ piṇḍāya caritvā pacchābhattaṁ piṇḍapātapaṭikkanto yena acelassa pāthikaputtassa ārāmo tenupasaṅkami divāvihārāya.

dn24:1.19.11 Abhikkamathāyasmanto abhikkamathāyasmanto, sādhurūpānaṁ samaṇānaṁ uttari manussadhammā iddhipāṭihāriyaṁ bhavissatī’ti.

dn24:1.19.12 Atha kho, bhaggava, abhiññātānaṁ abhiññātānaṁ nānātitthiyānaṁ samaṇabrāhmaṇānaṁ etadahosi:

dn24:1.19.13 ‘sādhurūpānaṁ kira, bho, samaṇānaṁ uttari manussadhammā iddhipāṭihāriyaṁ bhavissati;

dn24:1.19.14 handa vata, bho, gacchāmā’ti.

dn24:1.19.15 Atha kho, bhaggava, abhiññātā abhiññātā licchavī, abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā yena acelassa pāthikaputtassa ārāmo tenupasaṅkamiṁsu.

dn24:1.19.16 Sā esā, bhaggava, parisā mahā hoti anekasatā anekasahassā.

dn24:1.20.1 Assosi kho, bhaggava, acelo pāthikaputto:

dn24:1.20.2 ‘abhikkantā kira abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā.

dn24:1.20.3 Samaṇopi gotamo mayhaṁ ārāme divāvihāraṁ nisinno’ti.

dn24:1.20.4 Sutvānassa bhayaṁ chambhitattaṁ lomahaṁso udapādi.

dn24:1.20.5 Atha kho, bhaggava, acelo pāthikaputto bhīto saṁviggo lomahaṭṭhajāto yena tindukakhāṇuparibbājakārāmo tenupasaṅkami.

dn24:1.20.6 Assosi kho, bhaggava, sā parisā:

dn24:1.20.7 ‘acelo kira pāthikaputto bhīto saṁviggo lomahaṭṭhajāto yena tindukakhāṇuparibbājakārāmo tenupasaṅkanto’ti.

dn24:1.20.8 Atha kho, bhaggava, sā parisā aññataraṁ purisaṁ āmantesi:

dn24:1.20.9 ‘Ehi tvaṁ, bho purisa, yena tindukakhāṇuparibbājakārāmo, yena acelo pāthikaputto tenupasaṅkama. upasaṅkamitvā acelaṁ pāthikaputtaṁ evaṁ vadehi:

dn24:1.20.10 “abhikkamāvuso, pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā, samaṇopi gotamo āyasmato ārāme divāvihāraṁ nisinno;

dn24:1.20.11 bhāsitā kho pana te esā, āvuso pāthikaputta, vesāliyaṁ parisati vācā

dn24:1.20.12 samaṇopi gotamo ñāṇavādo, ahampi ñāṇavādo.

dn24:1.20.13 Ñāṇavādo kho pana ñāṇavādena arahati uttari manussadhammā iddhipāṭihāriyaṁ dassetuṁ.

dn24:1.20.14 Samaṇo gotamo upaḍḍhapathaṁ āgaccheyya ahampi upaḍḍhapathaṁ gaccheyyaṁ.

dn24:1.20.15 Te tattha ubhopi uttari manussadhammā iddhipāṭihāriyaṁ kareyyāma.

dn24:1.20.16 Ekañce samaṇo gotamo uttari manussadhammā iddhipāṭihāriyaṁ karissati, dvāhaṁ karissāmi.

dn24:1.20.17 Dve ce samaṇo gotamo uttari manussadhammā iddhipāṭihāriyāni karissati, cattārāhaṁ karissāmi.

dn24:1.20.18 Cattāri ce samaṇo gotamo uttari manussadhammā iddhipāṭihāriyāni karissati, aṭṭhāhaṁ karissāmi.

dn24:1.20.19 Iti yāvatakaṁ yāvatakaṁ samaṇo gotamo uttari manussadhammā iddhipāṭihāriyaṁ karissati, taddiguṇaṁ taddiguṇāhaṁ karissāmī”ti

dn24:1.20.20 abhikkamasseva kho āvuso pāthikaputta, upaḍḍhapathaṁ.

dn24:1.20.21 Sabbapaṭhamaṁyeva āgantvā samaṇo gotamo āyasmato ārāme divāvihāraṁ nisinno’ti.

dn24:1.21.1 Evaṁ, bhoti kho, bhaggava, so puriso tassā parisāya paṭissutvā yena tindukakhāṇuparibbājakārāmo, yena acelo pāthikaputto tenupasaṅkami. upasaṅkamitvā acelaṁ pāthikaputtaṁ etadavoca:

dn24:1.21.2 ‘abhikkamāvuso pāthikaputta, abhikkantā abhiññātā abhiññātā licchavī, abhikkantā abhiññātā abhiññātā ca brāhmaṇamahāsālā gahapatinecayikā nānātitthiyā samaṇabrāhmaṇā.

dn24:1.21.3 Samaṇopi gotamo āyasmato ārāme divāvihāraṁ nisinno.

dn24:1.21.4 Bhāsitā kho pana te esā, āvuso pāthikaputta, vesāliyaṁ parisati vācā—

dn24:1.21.5 samaṇopi gotamo ñāṇavādo; ahampi ñāṇavādo.

dn24:1.21.6 Ñāṇavādo kho pana ñāṇavādena arahati uttari manussadhammā iddhipāṭihāriyaṁ dassetuṁ …pe…

dn24:1.21.7 taddiguṇaṁ taddiguṇāhaṁ karissāmīti.

dn24:1.21.8 Abhikkamasseva kho, āvuso pāthikaputta, upaḍḍhapathaṁ.

dn24:1.21.9 Sabbapaṭhamaṁyeva āgantvā samaṇo gotamo āyasmato ārāme divāvihāraṁ nisinno’ti.

dn24:1.21.10 Evaṁ vutte, bhaggava, acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātuṁ.

dn24:1.21.11 Atha kho so, bhaggava, puriso acelaṁ pāthikaputtaṁ etadavoca:

dn24:1.21.12 ‘kiṁ su nāma te, āvuso pāthikaputta, pāvaḷā su nāma te pīṭhakasmiṁ allīnā, pīṭhakaṁ su nāma te pāvaḷāsu allīnaṁ?

dn24:1.21.13 Āyāmi āvuso, āyāmi āvusoti vatvā tattheva saṁsappasi, na sakkosi āsanāpi vuṭṭhātun’ti.

dn24:1.21.14 Evampi kho, bhaggava, vuccamāno acelo pāthikaputto ‘āyāmi, āvuso, āyāmi, āvuso’ti vatvā tattheva saṁsappati, na sakkoti āsanāpi vuṭṭhātuṁ.

dn24:1.22.1 Yadā kho so, bhaggava, puriso aññāsi:

dn24:1.22.2 ‘parābhūtarūpo ayaṁ acelo pāthikaputto.

dn24:1.22.3 Āyāmi, āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti.

dn24:1.22.4 Atha taṁ parisaṁ āgantvā evamārocesi:

dn24:1.22.5 ‘parābhūtarūpo, bho, acelo pāthikaputto.

dn24:1.22.6 Āyāmi, āvuso, āyāmi, āvusoti vatvā tattheva saṁsappati, na sakkoti āsanāpi vuṭṭhātun’ti.

dn24:1.22.7 Evaṁ vutte, ahaṁ, bhaggava, taṁ parisaṁ etadavocaṁ:

dn24:1.22.8 ‘abhabbo kho, āvuso, acelo pāthikaputto taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā mama sammukhībhāvaṁ āgantuṁ.

dn24:1.22.9 Sacepissa evamassa—

dn24:1.22.10 ahaṁ taṁ vācaṁ appahāya taṁ cittaṁ appahāya taṁ diṭṭhiṁ appaṭinissajjitvā samaṇassa gotamassa sammukhībhāvaṁ gaccheyyanti, muddhāpi tassa vipateyyā’ti.

dn24:1.22.11 Paṭhamabhāṇavāro niṭṭhito.