dn23:9.0 2.3. Gūthakūpapurisaupamā
BAGIAN 9
dn23:9.1 “Tena hi, rājañña, upamaṁ te karissāmi.
dn23:9.2 Upamāya m’idhekacce viññū purisā bhāsitassa atthaṁ ājānanti.
dn23:9.3 Seyyathāpi, rājañña, puriso gūthakūpe sasīsakaṁ nimuggo assa.
dn23:9.4 Atha tvaṁ purise āṇāpeyyāsi:
dn23:9.5 ‘tena hi, bho, taṁ purisaṁ tamhā gūthakūpā uddharathā’ti.
dn23:9.6 Te ‘sādhū’ti paṭissutvā taṁ purisaṁ tamhā gūthakūpā uddhareyyuṁ.
dn23:9.7 Te tvaṁ evaṁ vadeyyāsi:
dn23:9.8 ‘tena hi, bho, tassa purisassa kāyā veḷupesikāhi gūthaṁ sunimmajjitaṁ nimmajjathā’ti.
dn23:9.9 Te ‘sādhū’ti paṭissutvā tassa purisassa kāyā veḷupesikāhi gūthaṁ sunimmajjitaṁ nimmajjeyyuṁ.
dn23:9.10 Te tvaṁ evaṁ vadeyyāsi:
dn23:9.11 ‘tena hi, bho, tassa purisassa kāyaṁ paṇḍumattikāya tikkhattuṁ subbaṭṭitaṁ ubbaṭṭethā’ti.
dn23:9.12 Te tassa purisassa kāyaṁ paṇḍumattikāya tikkhattuṁ subbaṭṭitaṁ ubbaṭṭeyyuṁ.
dn23:9.13 Te tvaṁ evaṁ vadeyyāsi:
dn23:9.14 ‘tena hi, bho, taṁ purisaṁ telena abbhañjitvā sukhumena cuṇṇena tikkhattuṁ suppadhotaṁ karothā’ti.
dn23:9.15 Te taṁ purisaṁ telena abbhañjitvā sukhumena cuṇṇena tikkhattuṁ suppadhotaṁ kareyyuṁ.
dn23:9.16 Te tvaṁ evaṁ vadeyyāsi:
dn23:9.17 ‘tena hi, bho, tassa purisassa kesamassuṁ kappethā’ti.
dn23:9.18 Te tassa purisassa kesamassuṁ kappeyyuṁ.
dn23:9.19 Te tvaṁ evaṁ vadeyyāsi:
dn23:9.20 ‘tena hi, bho, tassa purisassa mahagghañca mālaṁ mahagghañca vilepanaṁ mahagghāni ca vatthāni upaharathā’ti.
dn23:9.21 Te tassa purisassa mahagghañca mālaṁ mahagghañca vilepanaṁ mahagghāni ca vatthāni upahareyyuṁ.
dn23:9.22 Te tvaṁ evaṁ vadeyyāsi:
dn23:9.23 ‘tena hi, bho, taṁ purisaṁ pāsādaṁ āropetvā pañcakāmaguṇāni upaṭṭhāpethā’ti.
dn23:9.24 Te taṁ purisaṁ pāsādaṁ āropetvā pañcakāmaguṇāni upaṭṭhāpeyyuṁ.
dn23:9.25 Taṁ kiṁ maññasi, rājañña,
dn23:9.26 api nu tassa purisassa sunhātassa suvilittassa sukappitakesamassussa āmukkamālābharaṇassa odātavatthavasanassa uparipāsādavaragatassa pañcahi kāmaguṇehi samappitassa samaṅgībhūtassa paricārayamānassa punadeva tasmiṁ gūthakūpe nimujjitukāmatā assā”ti?
dn23:9.27 “No hidaṁ, bho kassapa”.
dn23:9.28 “Taṁ kissa hetu”?
dn23:9.29 “Asuci, bho kassapa, gūthakūpo asuci ceva asucisaṅkhāto ca duggandho ca duggandhasaṅkhāto ca jeguccho ca jegucchasaṅkhāto ca paṭikūlo ca paṭikūlasaṅkhāto cā”ti.
dn23:9.30 “Evameva kho, rājañña, manussā devānaṁ asucī ceva asucisaṅkhātā ca, duggandhā ca duggandhasaṅkhātā ca, jegucchā ca jegucchasaṅkhātā ca, paṭikūlā ca paṭikūlasaṅkhātā ca.
dn23:9.31 Yojanasataṁ kho, rājañña, manussagandho deve ubbādhati.
dn23:9.32 Kiṁ pana te mittāmaccā ñātisālohitā pāṇātipātā paṭiviratā adinnādānā paṭiviratā kāmesumicchācārā paṭiviratā musāvādā paṭiviratā pisuṇāya vācāya paṭiviratā pharusāya vācāya paṭiviratā samphappalāpā paṭiviratā anabhijjhālū abyāpannacittā sammādiṭṭhī, kāyassa bhedā paraṁ maraṇā sugatiṁ saggaṁ lokaṁ upapannā te āgantvā ārocessanti:
dn23:9.33 ‘itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko’ti?
dn23:9.34 Imināpi kho te, rājañña, pariyāyena evaṁ hotu:
dn23:9.35 ‘itipi atthi paro loko, atthi sattā opapātikā, atthi sukatadukkaṭānaṁ kammānaṁ phalaṁ vipāko’”ti.