dn23:29.0 2.14. Sāṇabhārikaupamā
BAGIAN 29
dn23:29.1 “Tena hi, rājañña, upamaṁ te karissāmi,
dn23:29.2 upamāya m’idhekacce viññū purisā bhāsitassa atthaṁ ājānanti.
dn23:29.3 Bhūtapubbaṁ, rājañña, aññataro janapado vuṭṭhāsi.
dn23:29.4 Atha kho sahāyako sahāyakaṁ āmantesi:
dn23:29.5 ‘āyāma, samma, yena so janapado tenupasaṅkamissāma, appeva nāmettha kiñci dhanaṁ adhigaccheyyāmā’ti.
dn23:29.6 ‘Evaṁ, sammā’ti kho sahāyako sahāyakassa paccassosi.
dn23:29.7 Te yena so janapado, yena aññataraṁ gāmapaṭṭaṁ tenupasaṅkamiṁsu, tattha addasaṁsu pahūtaṁ sāṇaṁ chaḍḍitaṁ, disvā sahāyako sahāyakaṁ āmantesi:
dn23:29.8 ‘idaṁ kho, samma, pahūtaṁ sāṇaṁ chaḍḍitaṁ, tena hi, samma, tvañca sāṇabhāraṁ bandha, ahañca sāṇabhāraṁ bandhissāmi, ubho sāṇabhāraṁ ādāya gamissāmā’ti.
dn23:29.9 ‘Evaṁ, sammā’ti kho sahāyako sahāyakassa paṭissutvā sāṇabhāraṁ bandhitvā te ubho sāṇabhāraṁ ādāya yena aññataraṁ gāmapaṭṭaṁ tenupasaṅkamiṁsu.
dn23:29.10 Tattha addasaṁsu pahūtaṁ sāṇasuttaṁ chaḍḍitaṁ, disvā sahāyako sahāyakaṁ āmantesi:
dn23:29.11 ‘yassa kho, samma, atthāya iccheyyāma sāṇaṁ, idaṁ pahūtaṁ sāṇasuttaṁ chaḍḍitaṁ.
dn23:29.12 Tena hi, samma, tvañca sāṇabhāraṁ chaḍḍehi, ahañca sāṇabhāraṁ chaḍḍessāmi, ubho sāṇasuttabhāraṁ ādāya gamissāmā’ti.
dn23:29.13 ‘Ayaṁ kho me, samma, sāṇabhāro dūrābhato ca susannaddho ca, alaṁ me, tvaṁ pajānāhī’ti.
dn23:29.14 Atha kho so sahāyako sāṇabhāraṁ chaḍḍetvā sāṇasuttabhāraṁ ādiyi.
dn23:29.15 Te yena aññataraṁ gāmapaṭṭaṁ tenupasaṅkamiṁsu.
dn23:29.16 Tattha addasaṁsu pahūtā sāṇiyo chaḍḍitā, disvā sahāyako sahāyakaṁ āmantesi:
dn23:29.17 ‘yassa kho, samma, atthāya iccheyyāma sāṇaṁ vā sāṇasuttaṁ vā, imā pahūtā sāṇiyo chaḍḍitā.
dn23:29.18 Tena hi, samma, tvañca sāṇabhāraṁ chaḍḍehi, ahañca sāṇasuttabhāraṁ chaḍḍessāmi, ubho sāṇibhāraṁ ādāya gamissāmā’ti.
dn23:29.19 ‘Ayaṁ kho me, samma, sāṇabhāro dūrābhato ca susannaddho ca, alaṁ me, tvaṁ pajānāhī’ti.
dn23:29.20 Atha kho so sahāyako sāṇasuttabhāraṁ chaḍḍetvā sāṇibhāraṁ ādiyi.
dn23:29.21 Te yena aññataraṁ gāmapaṭṭaṁ tenupasaṅkamiṁsu.
dn23:29.22 Tattha addasaṁsu pahūtaṁ khomaṁ chaḍḍitaṁ, disvā …pe…
dn23:29.23 pahūtaṁ khomasuttaṁ chaḍḍitaṁ, disvā …
dn23:29.24 pahūtaṁ khomadussaṁ chaḍḍitaṁ, disvā …
dn23:29.25 pahūtaṁ kappāsaṁ chaḍḍitaṁ, disvā …
dn23:29.26 pahūtaṁ kappāsikasuttaṁ chaḍḍitaṁ, disvā …
dn23:29.27 pahūtaṁ kappāsikadussaṁ chaḍḍitaṁ, disvā …
dn23:29.28 pahūtaṁ ayaṁ chaḍḍitaṁ, disvā …
dn23:29.29 pahūtaṁ lohaṁ chaḍḍitaṁ, disvā …
dn23:29.30 pahūtaṁ tipuṁ chaḍḍitaṁ, disvā …
dn23:29.31 pahūtaṁ sīsaṁ chaḍḍitaṁ, disvā …
dn23:29.32 pahūtaṁ sajjhaṁ chaḍḍitaṁ, disvā …
dn23:29.33 pahūtaṁ suvaṇṇaṁ chaḍḍitaṁ, disvā sahāyako sahāyakaṁ āmantesi:
dn23:29.34 ‘yassa kho, samma, atthāya iccheyyāma sāṇaṁ vā sāṇasuttaṁ vā sāṇiyo vā khomaṁ vā khomasuttaṁ vā khomadussaṁ vā kappāsaṁ vā kappāsikasuttaṁ vā kappāsikadussaṁ vā ayaṁ vā lohaṁ vā tipuṁ vā sīsaṁ vā sajjhaṁ vā, idaṁ pahūtaṁ suvaṇṇaṁ chaḍḍitaṁ.
dn23:29.35 Tena hi, samma, tvañca sāṇabhāraṁ chaḍḍehi, ahañca sajjhabhāraṁ chaḍḍessāmi, ubho suvaṇṇabhāraṁ ādāya gamissāmā’ti.
dn23:29.36 ‘Ayaṁ kho me, samma, sāṇabhāro dūrābhato ca susannaddho ca, alaṁ me tvaṁ pajānāhī’ti.
dn23:29.37 Atha kho so sahāyako sajjhabhāraṁ chaḍḍetvā suvaṇṇabhāraṁ ādiyi.
dn23:29.38 Te yena sako gāmo tenupasaṅkamiṁsu.
dn23:29.39 Tattha yo so sahāyako sāṇabhāraṁ ādāya agamāsi, tassa neva mātāpitaro abhinandiṁsu, na puttadārā abhinandiṁsu, na mittāmaccā abhinandiṁsu, na ca tatonidānaṁ sukhaṁ somanassaṁ adhigacchi.
dn23:29.40 Yo pana so sahāyako suvaṇṇabhāraṁ ādāya agamāsi, tassa mātāpitaropi abhinandiṁsu, puttadārāpi abhinandiṁsu, mittāmaccāpi abhinandiṁsu, tatonidānañca sukhaṁ somanassaṁ adhigacchi.
dn23:29.41 Evameva kho tvaṁ, rājañña, sāṇabhārikūpamo maññe paṭibhāsi.
dn23:29.42 Paṭinissajjetaṁ, rājañña, pāpakaṁ diṭṭhigataṁ; paṭinissajjetaṁ, rājañña, pāpakaṁ diṭṭhigataṁ.
dn23:29.43 Mā te ahosi dīgharattaṁ ahitāya dukkhāyā”ti.