dn22:21.0 4.5.4. Maggasaccaniddesa
BAGIAN 21
dn22:21.1 Katamañca, bhikkhave, dukkhanirodhagāminī paṭipadā ariyasaccaṁ?
dn22:21.2 Ayameva ariyo aṭṭhaṅgiko maggo seyyathidaṁ—
dn22:21.3 sammādiṭṭhi sammāsaṅkappo sammāvācā sammākammanto sammāājīvo sammāvāyāmo sammāsati sammāsamādhi.
dn22:21.4 Katamā ca, bhikkhave, sammādiṭṭhi?
dn22:21.5 Yaṁ kho, bhikkhave, dukkhe ñāṇaṁ, dukkhasamudaye ñāṇaṁ, dukkhanirodhe ñāṇaṁ, dukkhanirodhagāminiyā paṭipadāya ñāṇaṁ.
dn22:21.6 Ayaṁ vuccati, bhikkhave, sammādiṭṭhi.
dn22:21.7 Katamo ca, bhikkhave, sammāsaṅkappo?
dn22:21.8 Nekkhammasaṅkappo abyāpādasaṅkappo avihiṁsāsaṅkappo.
dn22:21.9 Ayaṁ vuccati, bhikkhave, sammāsaṅkappo.
dn22:21.10 Katamā ca, bhikkhave, sammāvācā?
dn22:21.11 Musāvādā veramaṇī pisuṇāya vācāya veramaṇī pharusāya vācāya veramaṇī samphappalāpā veramaṇī.
dn22:21.12 Ayaṁ vuccati, bhikkhave, sammāvācā.
dn22:21.13 Katamo ca, bhikkhave, sammākammanto?
dn22:21.14 Pāṇātipātā veramaṇī adinnādānā veramaṇī kāmesumicchācārā veramaṇī.
dn22:21.15 Ayaṁ vuccati, bhikkhave, sammākammanto.
dn22:21.16 Katamo ca, bhikkhave, sammāājīvo?
dn22:21.17 Idha, bhikkhave, ariyasāvako micchāājīvaṁ pahāya sammāājīvena jīvitaṁ kappeti.
dn22:21.18 Ayaṁ vuccati, bhikkhave, sammāājīvo.
dn22:21.19 Katamo ca, bhikkhave, sammāvāyāmo?
dn22:21.20 Idha, bhikkhave, bhikkhu anuppannānaṁ pāpakānaṁ akusalānaṁ dhammānaṁ anuppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
dn22:21.21 uppannānaṁ pāpakānaṁ akusalānaṁ dhammānaṁ pahānāya chandaṁ janeti vāyamati vīriyaṁ ārabhati cittaṁ paggaṇhāti padahati;
dn22:21.22 anuppannānaṁ kusalānaṁ dhammānaṁ uppādāya chandaṁ janeti vāyamati vīriyaṁ ārabhati cittaṁ paggaṇhāti padahati;
dn22:21.23 uppannānaṁ kusalānaṁ dhammānaṁ ṭhitiyā asammosāya bhiyyobhāvāya vepullāya bhāvanāya pāripūriyā chandaṁ janeti vāyamati vīriyaṁ ārabhati cittaṁ paggaṇhāti padahati.
dn22:21.24 Ayaṁ vuccati, bhikkhave, sammāvāyāmo.
dn22:21.25 Katamā ca, bhikkhave, sammāsati?
dn22:21.26 Idha, bhikkhave, bhikkhu kāye kāyānupassī viharati ātāpī sampajāno satimā vineyya loke abhijjhādomanassaṁ;
dn22:21.27 vedanāsu vedanānupassī viharati ātāpī sampajāno satimā vineyya loke abhijjhādomanassaṁ;
dn22:21.28 citte cittānupassī viharati ātāpī sampajāno satimā vineyya loke abhijjhādomanassaṁ;
dn22:21.29 dhammesu dhammānupassī viharati ātāpī sampajāno satimā vineyya loke abhijjhādomanassaṁ.
dn22:21.30 Ayaṁ vuccati, bhikkhave, sammāsati.
dn22:21.31 Katamo ca, bhikkhave, sammāsamādhi?
dn22:21.32 Idha, bhikkhave, bhikkhu vivicceva kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati.
dn22:21.33 Vitakkavicārānaṁ vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ pītisukhaṁ dutiyaṁ jhānaṁ upasampajja viharati.
dn22:21.34 Pītiyā ca virāgā upekkhako ca viharati, sato ca sampajāno, sukhañca kāyena paṭisaṁvedeti, yaṁ taṁ ariyā ācikkhanti ‘upekkhako satimā sukhavihārī’ti tatiyaṁ jhānaṁ upasampajja viharati.
dn22:21.35 Sukhassa ca pahānā dukkhassa ca pahānā pubbeva somanassadomanassānaṁ atthaṅgamā adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
dn22:21.36 Ayaṁ vuccati, bhikkhave, sammāsamādhi.
dn22:21.37 Idaṁ vuccati, bhikkhave, dukkhanirodhagāminī paṭipadā ariyasaccaṁ.
dn22:21.38 Iti ajjhattaṁ vā dhammesu dhammānupassī viharati, bahiddhā vā dhammesu dhammānupassī viharati, ajjhattabahiddhā vā dhammesu dhammānupassī viharati.
dn22:21.39 Samudayadhammānupassī vā dhammesu viharati, vayadhammānupassī vā dhammesu viharati, samudayavayadhammānupassī vā dhammesu viharati.
dn22:21.40 ‘Atthi dhammā’ti vā panassa sati paccupaṭṭhitā hoti yāvadeva ñāṇamattāya paṭissatimattāya anissito ca viharati, na ca kiñci loke upādiyati.
dn22:21.41 Evampi kho, bhikkhave, bhikkhu dhammesu dhammānupassī viharati catūsu ariyasaccesu.
dn22:21.42 Saccapabbaṁ niṭṭhitaṁ.
dn22:21.43 Dhammānupassanā niṭṭhitā.