Mahāsatipaṭṭhānasutta

dn22:18.0 4.5.1. Dukkhasaccaniddesa

dn22:18.1 Katamañca, bhikkhave, dukkhaṁ ariyasaccaṁ?

dn22:18.2 Jātipi dukkhā, jarāpi dukkhā, maraṇampi dukkhaṁ, sokaparidevadukkhadomanassupāyāsāpi dukkhā, appiyehi sampayogopi dukkho, piyehi vippayogopi dukkho, yampicchaṁ na labhati tampi dukkhaṁ, saṅkhittena pañcupādānakkhandhā dukkhā.

dn22:18.3 Katamā ca, bhikkhave, jāti?

dn22:18.4 Yā tesaṁ tesaṁ sattānaṁ tamhi tamhi sattanikāye jāti sañjāti okkanti abhinibbatti khandhānaṁ pātubhāvo āyatanānaṁ paṭilābho,

dn22:18.5 ayaṁ vuccati, bhikkhave, jāti.

dn22:18.6 Katamā ca, bhikkhave, jarā?

dn22:18.7 Yā tesaṁ tesaṁ sattānaṁ tamhi tamhi sattanikāye jarā jīraṇatā khaṇḍiccaṁ pāliccaṁ valittacatā āyuno saṁhāni indriyānaṁ paripāko,

dn22:18.8 ayaṁ vuccati, bhikkhave, jarā.

dn22:18.9 Katamañca, bhikkhave, maraṇaṁ?

dn22:18.10 Yaṁ tesaṁ tesaṁ sattānaṁ tamhā tamhā sattanikāyā cuti cavanatā bhedo antaradhānaṁ maccu maraṇaṁ kālakiriyā khandhānaṁ bhedo kaḷevarassa nikkhepo jīvitindriyassupacchedo,

dn22:18.11 idaṁ vuccati, bhikkhave, maraṇaṁ.

dn22:18.12 Katamo ca, bhikkhave, soko?

dn22:18.13 Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa soko socanā socitattaṁ antosoko antoparisoko,

dn22:18.14 ayaṁ vuccati, bhikkhave, soko.

dn22:18.15 Katamo ca, bhikkhave, paridevo?

dn22:18.16 Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa ādevo paridevo ādevanā paridevanā ādevitattaṁ paridevitattaṁ,

dn22:18.17 ayaṁ vuccati, bhikkhave, paridevo.

dn22:18.18 Katamañca, bhikkhave, dukkhaṁ?

dn22:18.19 Yaṁ kho, bhikkhave, kāyikaṁ dukkhaṁ kāyikaṁ asātaṁ kāyasamphassajaṁ dukkhaṁ asātaṁ vedayitaṁ,

dn22:18.20 idaṁ vuccati, bhikkhave, dukkhaṁ.

dn22:18.21 Katamañca, bhikkhave, domanassaṁ?

dn22:18.22 Yaṁ kho, bhikkhave, cetasikaṁ dukkhaṁ cetasikaṁ asātaṁ manosamphassajaṁ dukkhaṁ asātaṁ vedayitaṁ,

dn22:18.23 idaṁ vuccati, bhikkhave, domanassaṁ.

dn22:18.24 Katamo ca, bhikkhave, upāyāso?

dn22:18.25 Yo kho, bhikkhave, aññataraññatarena byasanena samannāgatassa aññataraññatarena dukkhadhammena phuṭṭhassa āyāso upāyāso āyāsitattaṁ upāyāsitattaṁ,

dn22:18.26 ayaṁ vuccati, bhikkhave, upāyāso.

dn22:18.27 Katamo ca, bhikkhave, appiyehi sampayogo dukkho?

dn22:18.28 Idha yassa te honti aniṭṭhā akantā amanāpā rūpā saddā gandhā rasā phoṭṭhabbā dhammā, ye vā panassa te honti anatthakāmā ahitakāmā aphāsukakāmā ayogakkhemakāmā, yā tehi saddhiṁ saṅgati samāgamo samodhānaṁ missībhāvo,

dn22:18.29 ayaṁ vuccati, bhikkhave, appiyehi sampayogo dukkho.

dn22:18.30 Katamo ca, bhikkhave, piyehi vippayogo dukkho?

dn22:18.31 Idha yassa te honti iṭṭhā kantā manāpā rūpā saddā gandhā rasā phoṭṭhabbā dhammā, ye vā panassa te honti atthakāmā hitakāmā phāsukakāmā yogakkhemakāmā mātā vā pitā vā bhātā vā bhaginī vā mittā vā amaccā vā ñātisālohitā vā, yā tehi saddhiṁ asaṅgati asamāgamo asamodhānaṁ amissībhāvo,

dn22:18.32 ayaṁ vuccati, bhikkhave, piyehi vippayogo dukkho.

dn22:18.33 Katamañca, bhikkhave, yampicchaṁ na labhati tampi dukkhaṁ?

dn22:18.34 Jātidhammānaṁ, bhikkhave, sattānaṁ evaṁ icchā uppajjati:

dn22:18.35 ‘aho vata mayaṁ na jātidhammā assāma, na ca vata no jāti āgaccheyyā’ti.

dn22:18.36 Na kho panetaṁ icchāya pattabbaṁ,

dn22:18.37 idampi yampicchaṁ na labhati tampi dukkhaṁ.

dn22:18.38 Jarādhammānaṁ, bhikkhave, sattānaṁ evaṁ icchā uppajjati:

dn22:18.39 ‘aho vata mayaṁ na jarādhammā assāma, na ca vata no jarā āgaccheyyā’ti.

dn22:18.40 Na kho panetaṁ icchāya pattabbaṁ, idampi yampicchaṁ na labhati tampi dukkhaṁ.

dn22:18.41 Byādhidhammānaṁ, bhikkhave, sattānaṁ evaṁ icchā uppajjati ‘aho vata mayaṁ na byādhidhammā assāma, na ca vata no byādhi āgaccheyyā’ti.

dn22:18.42 Na kho panetaṁ icchāya pattabbaṁ, idampi yampicchaṁ na labhati tampi dukkhaṁ.

dn22:18.43 Maraṇadhammānaṁ, bhikkhave, sattānaṁ evaṁ icchā uppajjati ‘aho vata mayaṁ na maraṇadhammā assāma, na ca vata no maraṇaṁ āgaccheyyā’ti.

dn22:18.44 Na kho panetaṁ icchāya pattabbaṁ, idampi yampicchaṁ na labhati tampi dukkhaṁ.

dn22:18.45 Sokaparidevadukkhadomanassupāyāsadhammānaṁ, bhikkhave, sattānaṁ evaṁ icchā uppajjati ‘aho vata mayaṁ na sokaparidevadukkhadomanassupāyāsadhammā assāma, na ca vata no sokaparidevadukkhadomanassupāyāsadhammā āgaccheyyun’ti.

dn22:18.46 Na kho panetaṁ icchāya pattabbaṁ,

dn22:18.47 idampi yampicchaṁ na labhati tampi dukkhaṁ.

dn22:18.48 Katame ca, bhikkhave, saṅkhittena pañcupādānakkhandhā dukkhā?

dn22:18.49 Seyyathidaṁ—rūpupādānakkhandho, vedanupādānakkhandho, saññupādānakkhandho, saṅkhārupādānakkhandho, viññāṇupādānakkhandho.

dn22:18.50 Ime vuccanti, bhikkhave, saṅkhittena pañcupādānakkhandhā dukkhā.

dn22:18.51 Idaṁ vuccati, bhikkhave, dukkhaṁ ariyasaccaṁ.