Mahāsamayasutta

dn20:3.1 Atha kho tā devatā seyyathāpi nāma balavā puriso samiñjitaṁ vā bāhaṁ pasāreyya pasāritaṁ vā bāhaṁ samiñjeyya; evameva—suddhāvāsesu devesu antarahitā bhagavato purato pāturahesuṁ.

dn20:3.2 Atha kho tā devatā bhagavantaṁ abhivādetvā ekamantaṁ aṭṭhaṁsu.

dn20:3.3 Ekamantaṁ ṭhitā kho ekā devatā bhagavato santike imaṁ gāthaṁ abhāsi:

dn20:3.4 “Mahāsamayo pavanasmiṁ,

dn20:3.5 Devakāyā samāgatā;

dn20:3.6 Āgatamha imaṁ dhammasamayaṁ,

dn20:3.7 Dakkhitāye aparājitasaṅghan”ti.

dn20:3.8 Atha kho aparā devatā bhagavato santike imaṁ gāthaṁ abhāsi:

dn20:3.9 “Tatra bhikkhavo samādahaṁsu,

dn20:3.10 Cittamattano ujukaṁ akaṁsu;

dn20:3.11 Sārathīva nettāni gahetvā,

dn20:3.12 Indriyāni rakkhanti paṇḍitā”ti.

dn20:3.13 Atha kho aparā devatā bhagavato santike imaṁ gāthaṁ abhāsi:

dn20:3.14 “Chetvā khīlaṁ chetvā palighaṁ,

dn20:3.15 Indakhīlaṁ ūhacca manejā;

dn20:3.16 Te caranti suddhā vimalā,

dn20:3.17 Cakkhumatā sudantā susunāgā”ti.

dn20:3.18 Atha kho aparā devatā bhagavato santike imaṁ gāthaṁ abhāsi:

dn20:3.19 “Ye keci buddhaṁ saraṇaṁ gatāse,

dn20:3.20 Na te gamissanti apāyabhūmiṁ;

dn20:3.21 Pahāya mānusaṁ dehaṁ,

dn20:3.22 Devakāyaṁ paripūressantī”ti.