dn14:2.1.0 5. Jiṇṇapurisa
BAGIAN 2
dn14:2.1.1 Atha kho, bhikkhave, vipassī kumāro bahūnaṁ vassānaṁ bahūnaṁ vassasatānaṁ bahūnaṁ vassasahassānaṁ accayena sārathiṁ āmantesi:
dn14:2.1.2 ‘yojehi, samma sārathi, bhaddāni bhaddāni yānāni uyyānabhūmiṁ gacchāma subhūmidassanāyā’ti.
dn14:2.1.3 ‘Evaṁ, devā’ti kho, bhikkhave, sārathi vipassissa kumārassa paṭissutvā bhaddāni bhaddāni yānāni yojetvā vipassissa kumārassa paṭivedesi:
dn14:2.1.4 ‘yuttāni kho te, deva, bhaddāni bhaddāni yānāni,
dn14:2.1.5 yassadāni kālaṁ maññasī’ti.
dn14:2.1.6 Atha kho, bhikkhave, vipassī kumāro bhaddaṁ bhaddaṁ yānaṁ abhiruhitvā bhaddehi bhaddehi yānehi uyyānabhūmiṁ niyyāsi.
dn14:2.2.1 Addasā kho, bhikkhave, vipassī kumāro uyyānabhūmiṁ niyyanto purisaṁ jiṇṇaṁ gopānasivaṅkaṁ bhoggaṁ daṇḍaparāyanaṁ pavedhamānaṁ gacchantaṁ āturaṁ gatayobbanaṁ.
dn14:2.2.2 Disvā sārathiṁ āmantesi:
dn14:2.2.3 ‘ayaṁ pana, samma sārathi, puriso kiṅkato?
dn14:2.2.4 Kesāpissa na yathā aññesaṁ, kāyopissa na yathā aññesan’ti.
dn14:2.2.5 ‘Eso kho, deva, jiṇṇo nāmā’ti.
dn14:2.2.6 ‘Kiṁ paneso, samma sārathi, jiṇṇo nāmā’ti?
dn14:2.2.7 ‘Eso kho, deva, jiṇṇo nāma. Na dāni tena ciraṁ jīvitabbaṁ bhavissatī’ti.
dn14:2.2.8 ‘Kiṁ pana, samma sārathi, ahampi jarādhammo, jaraṁ anatīto’ti?
dn14:2.2.9 ‘Tvañca, deva, mayañcamha sabbe jarādhammā, jaraṁ anatītā’ti.
dn14:2.2.10 ‘Tena hi, samma sārathi, alaṁ dānajja uyyānabhūmiyā. Itova antepuraṁ paccaniyyāhī’ti.
dn14:2.2.11 ‘Evaṁ, devā’ti kho, bhikkhave, sārathi vipassissa kumārassa paṭissutvā tatova antepuraṁ paccaniyyāsi.
dn14:2.2.12 Tatra sudaṁ, bhikkhave, vipassī kumāro antepuraṁ gato dukkhī dummano pajjhāyati:
dn14:2.2.13 ‘dhiratthu kira, bho, jāti nāma, yatra hi nāma jātassa jarā paññāyissatī’ti.
dn14:2.3.1 Atha kho, bhikkhave, bandhumā rājā sārathiṁ āmantāpetvā etadavoca:
dn14:2.3.2 ‘kacci, samma sārathi, kumāro uyyānabhūmiyā abhiramittha? Kacci, samma sārathi, kumāro uyyānabhūmiyā attamano ahosī’ti?
dn14:2.3.3 ‘Na kho, deva, kumāro uyyānabhūmiyā abhiramittha, na kho, deva, kumāro uyyānabhūmiyā attamano ahosī’ti.
dn14:2.3.4 ‘Kiṁ pana, samma sārathi, addasa kumāro uyyānabhūmiṁ niyyanto’ti?
dn14:2.3.5 ‘Addasā kho, deva, kumāro uyyānabhūmiṁ niyyanto purisaṁ jiṇṇaṁ gopānasivaṅkaṁ bhoggaṁ daṇḍaparāyanaṁ pavedhamānaṁ gacchantaṁ āturaṁ gatayobbanaṁ.
dn14:2.3.6 Disvā maṁ etadavoca:
dn14:2.3.7 “ayaṁ pana, samma sārathi, puriso kiṅkato, kesāpissa na yathā aññesaṁ, kāyopissa na yathā aññesan”ti?
dn14:2.3.8 “Eso kho, deva, jiṇṇo nāmā”ti.
dn14:2.3.9 “Kiṁ paneso, samma sārathi, jiṇṇo nāmā”ti?
dn14:2.3.10 “Eso kho, deva, jiṇṇo nāma na dāni tena ciraṁ jīvitabbaṁ bhavissatī”ti.
dn14:2.3.11 “Kiṁ pana, samma sārathi, ahampi jarādhammo, jaraṁ anatīto”ti?
dn14:2.3.12 “Tvañca, deva, mayañcamha sabbe jarādhammā, jaraṁ anatītā”ti.
dn14:2.3.13 “Tena hi, samma sārathi, alaṁ dānajja uyyānabhūmiyā, itova antepuraṁ paccaniyyāhī”ti.
dn14:2.3.14 “Evaṁ, devā”ti kho ahaṁ, deva, vipassissa kumārassa paṭissutvā tatova antepuraṁ paccaniyyāsiṁ.
dn14:2.3.15 So kho, deva, kumāro antepuraṁ gato dukkhī dummano pajjhāyati:
dn14:2.3.16 “dhiratthu kira, bho, jāti nāma, yatra hi nāma jātassa jarā paññāyissatī”’ti.
dn14:2.4.0 6. Byādhitapurisa
dn14:2.4.1 Atha kho, bhikkhave, bandhumassa rañño etadahosi:
dn14:2.4.2 ‘Mā heva kho vipassī kumāro na rajjaṁ kāresi, mā heva vipassī kumāro agārasmā anagāriyaṁ pabbaji, mā heva nemittānaṁ brāhmaṇānaṁ saccaṁ assa vacanan’ti.
dn14:2.4.3 Atha kho, bhikkhave, bandhumā rājā vipassissa kumārassa bhiyyoso mattāya pañca kāmaguṇāni upaṭṭhāpesi:
dn14:2.4.4 ‘yathā vipassī kumāro rajjaṁ kareyya, yathā vipassī kumāro na agārasmā anagāriyaṁ pabbajeyya, yathā nemittānaṁ brāhmaṇānaṁ micchā assa vacanan’ti.
dn14:2.4.5 Tatra sudaṁ, bhikkhave, vipassī kumāro pañcahi kāmaguṇehi samappito samaṅgībhūto paricāreti.
dn14:2.5.1 Atha kho, bhikkhave, vipassī kumāro bahūnaṁ vassānaṁ …pe…
dn14:2.6.1 Addasā kho, bhikkhave, vipassī kumāro uyyānabhūmiṁ niyyanto purisaṁ ābādhikaṁ dukkhitaṁ bāḷhagilānaṁ sake muttakarīse palipannaṁ semānaṁ aññehi vuṭṭhāpiyamānaṁ aññehi saṁvesiyamānaṁ.
dn14:2.6.2 Disvā sārathiṁ āmantesi:
dn14:2.6.3 ‘ayaṁ pana, samma sārathi, puriso kiṅkato?
dn14:2.6.4 Akkhīnipissa na yathā aññesaṁ, saropissa na yathā aññesan’ti?
dn14:2.6.5 ‘Eso kho, deva, byādhito nāmā’ti.
dn14:2.6.6 ‘Kiṁ paneso, samma sārathi, byādhito nāmā’ti?
dn14:2.6.7 ‘Eso kho, deva, byādhito nāma appeva nāma tamhā ābādhā vuṭṭhaheyyā’ti.
dn14:2.6.8 ‘Kiṁ pana, samma sārathi, ahampi byādhidhammo, byādhiṁ anatīto’ti?
dn14:2.6.9 ‘Tvañca, deva, mayañcamha sabbe byādhidhammā, byādhiṁ anatītā’ti.
dn14:2.6.10 ‘Tena hi, samma sārathi, alaṁ dānajja uyyānabhūmiyā, itova antepuraṁ paccaniyyāhī’ti.
dn14:2.6.11 ‘Evaṁ, devā’ti kho, bhikkhave, sārathi vipassissa kumārassa paṭissutvā tatova antepuraṁ paccaniyyāsi.
dn14:2.6.12 Tatra sudaṁ, bhikkhave, vipassī kumāro antepuraṁ gato dukkhī dummano pajjhāyati:
dn14:2.6.13 ‘dhiratthu kira, bho, jāti nāma, yatra hi nāma jātassa jarā paññāyissati, byādhi paññāyissatī’ti.
dn14:2.7.1 Atha kho, bhikkhave, bandhumā rājā sārathiṁ āmantāpetvā etadavoca:
dn14:2.7.2 ‘kacci, samma sārathi, kumāro uyyānabhūmiyā abhiramittha, kacci, samma sārathi, kumāro uyyānabhūmiyā attamano ahosī’ti?
dn14:2.7.3 ‘Na kho, deva, kumāro uyyānabhūmiyā abhiramittha, na kho, deva, kumāro uyyānabhūmiyā attamano ahosī’ti.
dn14:2.7.4 ‘Kiṁ pana, samma sārathi, addasa kumāro uyyānabhūmiṁ niyyanto’ti?
dn14:2.7.5 ‘Addasā kho, deva, kumāro uyyānabhūmiṁ niyyanto purisaṁ ābādhikaṁ dukkhitaṁ bāḷhagilānaṁ sake muttakarīse palipannaṁ semānaṁ aññehi vuṭṭhāpiyamānaṁ aññehi saṁvesiyamānaṁ.
dn14:2.7.6 Disvā maṁ etadavoca:
dn14:2.7.7 “ayaṁ pana, samma sārathi, puriso kiṅkato, akkhīnipissa na yathā aññesaṁ, saropissa na yathā aññesan”ti?
dn14:2.7.8 “Eso kho, deva, byādhito nāmā”ti.
dn14:2.7.9 “Kiṁ paneso, samma sārathi, byādhito nāmā”ti?
dn14:2.7.10 “Eso kho, deva, byādhito nāma appeva nāma tamhā ābādhā vuṭṭhaheyyā”ti.
dn14:2.7.11 “Kiṁ pana, samma sārathi, ahampi byādhidhammo, byādhiṁ anatīto”ti?
dn14:2.7.12 “Tvañca, deva, mayañcamha sabbe byādhidhammā, byādhiṁ anatītā”ti.
dn14:2.7.13 “Tena hi, samma sārathi, alaṁ dānajja uyyānabhūmiyā, itova antepuraṁ paccaniyyāhī”ti.
dn14:2.7.14 “Evaṁ, devā”ti kho ahaṁ, deva, vipassissa kumārassa paṭissutvā tatova antepuraṁ paccaniyyāsiṁ.
dn14:2.7.15 So kho, deva, kumāro antepuraṁ gato dukkhī dummano pajjhāyati:
dn14:2.7.16 “dhiratthu kira, bho, jāti nāma, yatra hi nāma jātassa jarā paññāyissati, byādhi paññāyissatī”’ti.
dn14:2.8.0 7. Kālaṅkatapurisa
dn14:2.8.1 Atha kho, bhikkhave, bandhumassa rañño etadahosi:
dn14:2.8.2 ‘mā heva kho vipassī kumāro na rajjaṁ kāresi, mā heva vipassī kumāro agārasmā anagāriyaṁ pabbaji, mā heva nemittānaṁ brāhmaṇānaṁ saccaṁ assa vacanan’ti.
dn14:2.8.3 Atha kho, bhikkhave, bandhumā rājā vipassissa kumārassa bhiyyoso mattāya pañca kāmaguṇāni upaṭṭhāpesi:
dn14:2.8.4 ‘yathā vipassī kumāro rajjaṁ kareyya, yathā vipassī kumāro na agārasmā anagāriyaṁ pabbajeyya, yathā nemittānaṁ brāhmaṇānaṁ micchā assa vacanan’ti.
dn14:2.9.1 Tatra sudaṁ, bhikkhave, vipassī kumāro pañcahi kāmaguṇehi samappito samaṅgībhūto paricāreti.
dn14:2.9.2 Atha kho, bhikkhave, vipassī kumāro bahūnaṁ vassānaṁ …pe…
dn14:2.10.1 Addasā kho, bhikkhave, vipassī kumāro uyyānabhūmiṁ niyyanto mahājanakāyaṁ sannipatitaṁ nānārattānañca dussānaṁ vilātaṁ kayiramānaṁ.
dn14:2.10.2 Disvā sārathiṁ āmantesi:
dn14:2.10.3 ‘kiṁ nu kho so, samma sārathi, mahājanakāyo sannipatito nānārattānañca dussānaṁ vilātaṁ kayiratī’ti?
dn14:2.10.4 ‘Eso kho, deva, kālaṅkato nāmā’ti.
dn14:2.10.5 ‘Tena hi, samma sārathi, yena so kālaṅkato tena rathaṁ pesehī’ti.
dn14:2.10.6 ‘Evaṁ, devā’ti kho, bhikkhave, sārathi vipassissa kumārassa paṭissutvā yena so kālaṅkato tena rathaṁ pesesi.
dn14:2.10.7 Addasā kho, bhikkhave, vipassī kumāro petaṁ kālaṅkataṁ, disvā sārathiṁ āmantesi:
dn14:2.10.8 ‘kiṁ panāyaṁ, samma sārathi, kālaṅkato nāmā’ti?
dn14:2.10.9 ‘Eso kho, deva, kālaṅkato nāma. Na dāni taṁ dakkhanti mātā vā pitā vā aññe vā ñātisālohitā, sopi na dakkhissati mātaraṁ vā pitaraṁ vā aññe vā ñātisālohite’ti.
dn14:2.10.10 ‘Kiṁ pana, samma sārathi, ahampi maraṇadhammo maraṇaṁ anatīto;
dn14:2.10.11 mampi na dakkhanti devo vā devī vā aññe vā ñātisālohitā;
dn14:2.10.12 ahampi na dakkhissāmi devaṁ vā deviṁ vā aññe vā ñātisālohite’ti?
dn14:2.10.13 ‘Tvañca, deva, mayañcamha sabbe maraṇadhammā maraṇaṁ anatītā;
dn14:2.10.14 tampi na dakkhanti devo vā devī vā aññe vā ñātisālohitā;
dn14:2.10.15 tvampi na dakkhissasi devaṁ vā deviṁ vā aññe vā ñātisālohite’ti.
dn14:2.10.16 ‘Tena hi, samma sārathi, alaṁ dānajja uyyānabhūmiyā, itova antepuraṁ paccaniyyāhī’ti.
dn14:2.10.17 ‘Evaṁ, devā’ti kho, bhikkhave, sārathi vipassissa kumārassa paṭissutvā tatova antepuraṁ paccaniyyāsi.
dn14:2.10.18 Tatra sudaṁ, bhikkhave, vipassī kumāro antepuraṁ gato dukkhī dummano pajjhāyati:
dn14:2.10.19 ‘dhiratthu kira, bho, jāti nāma, yatra hi nāma jātassa jarā paññāyissati, byādhi paññāyissati, maraṇaṁ paññāyissatī’ti.
dn14:2.11.1 Atha kho, bhikkhave, bandhumā rājā sārathiṁ āmantāpetvā etadavoca:
dn14:2.11.2 ‘kacci, samma sārathi, kumāro uyyānabhūmiyā abhiramittha, kacci, samma sārathi, kumāro uyyānabhūmiyā attamano ahosī’ti?
dn14:2.11.3 ‘Na kho, deva, kumāro uyyānabhūmiyā abhiramittha, na kho, deva, kumāro uyyānabhūmiyā attamano ahosī’ti.
dn14:2.11.4 ‘Kiṁ pana, samma sārathi, addasa kumāro uyyānabhūmiṁ niyyanto’ti?
dn14:2.11.5 ‘Addasā kho, deva, kumāro uyyānabhūmiṁ niyyanto mahājanakāyaṁ sannipatitaṁ nānārattānañca dussānaṁ vilātaṁ kayiramānaṁ.
dn14:2.11.6 Disvā maṁ etadavoca:
dn14:2.11.7 “kiṁ nu kho so, samma sārathi, mahājanakāyo sannipatito nānārattānañca dussānaṁ vilātaṁ kayiratī”ti?
dn14:2.11.8 “Eso kho, deva, kālaṅkato nāmā”ti.
dn14:2.11.9 “Tena hi, samma sārathi, yena so kālaṅkato tena rathaṁ pesehī”ti.
dn14:2.11.10 “Evaṁ, devā”ti kho ahaṁ, deva, vipassissa kumārassa paṭissutvā yena so kālaṅkato tena rathaṁ pesesiṁ.
dn14:2.11.11 Addasā kho, deva, kumāro petaṁ kālaṅkataṁ, disvā maṁ etadavoca:
dn14:2.11.12 “kiṁ panāyaṁ, samma sārathi, kālaṅkato nāmā”ti?
dn14:2.11.13 “Eso kho, deva, kālaṅkato nāma.
dn14:2.11.14 Na dāni taṁ dakkhanti mātā vā pitā vā aññe vā ñātisālohitā, sopi na dakkhissati mātaraṁ vā pitaraṁ vā aññe vā ñātisālohite”ti.
dn14:2.11.15 “Kiṁ pana, samma sārathi, ahampi maraṇadhammo maraṇaṁ anatīto;
dn14:2.11.16 mampi na dakkhanti devo vā devī vā aññe vā ñātisālohitā;
dn14:2.11.17 ahampi na dakkhissāmi devaṁ vā deviṁ vā aññe vā ñātisālohite”ti?
dn14:2.11.18 “Tvañca, deva, mayañcamha sabbe maraṇadhammā maraṇaṁ anatītā;
dn14:2.11.19 tampi na dakkhanti devo vā devī vā aññe vā ñātisālohitā, tvampi na dakkhissasi devaṁ vā deviṁ vā aññe vā ñātisālohite”ti.
dn14:2.11.20 “Tena hi, samma sārathi, alaṁ dānajja uyyānabhūmiyā, itova antepuraṁ paccaniyyāhī”ti.
dn14:2.11.21 “Evaṁ, devā”ti kho ahaṁ, deva, vipassissa kumārassa paṭissutvā tatova antepuraṁ paccaniyyāsiṁ.
dn14:2.11.22 So kho, deva, kumāro antepuraṁ gato dukkhī dummano pajjhāyati:
dn14:2.11.23 “dhiratthu kira, bho, jāti nāma, yatra hi nāma jātassa jarā paññāyissati, byādhi paññāyissati, maraṇaṁ paññāyissatī”’ti.
dn14:2.12.0 8. Pabbajita
dn14:2.12.1 Atha kho, bhikkhave, bandhumassa rañño etadahosi:
dn14:2.12.2 ‘mā heva kho vipassī kumāro na rajjaṁ kāresi, mā heva vipassī kumāro agārasmā anagāriyaṁ pabbaji, mā heva nemittānaṁ brāhmaṇānaṁ saccaṁ assa vacanan’ti.
dn14:2.12.3 Atha kho, bhikkhave, bandhumā rājā vipassissa kumārassa bhiyyoso mattāya pañca kāmaguṇāni upaṭṭhāpesi:
dn14:2.12.4 ‘yathā vipassī kumāro rajjaṁ kareyya, yathā vipassī kumāro na agārasmā anagāriyaṁ pabbajeyya, yathā nemittānaṁ brāhmaṇānaṁ micchā assa vacanan’ti.
dn14:2.13.1 Tatra sudaṁ, bhikkhave, vipassī kumāro pañcahi kāmaguṇehi samappito samaṅgībhūto paricāreti.
dn14:2.13.2 Atha kho, bhikkhave, vipassī kumāro bahūnaṁ vassānaṁ bahūnaṁ vassasatānaṁ bahūnaṁ vassasahassānaṁ accayena sārathiṁ āmantesi:
dn14:2.13.3 ‘yojehi, samma sārathi, bhaddāni bhaddāni yānāni, uyyānabhūmiṁ gacchāma subhūmidassanāyā’ti.
dn14:2.13.4 ‘Evaṁ, devā’ti kho, bhikkhave, sārathi vipassissa kumārassa paṭissutvā bhaddāni bhaddāni yānāni yojetvā vipassissa kumārassa paṭivedesi:
dn14:2.13.5 ‘yuttāni kho te, deva, bhaddāni bhaddāni yānāni,
dn14:2.13.6 yassadāni kālaṁ maññasī’ti.
dn14:2.13.7 Atha kho, bhikkhave, vipassī kumāro bhaddaṁ bhaddaṁ yānaṁ abhiruhitvā bhaddehi bhaddehi yānehi uyyānabhūmiṁ niyyāsi.
dn14:2.14.1 Addasā kho, bhikkhave, vipassī kumāro uyyānabhūmiṁ niyyanto purisaṁ bhaṇḍuṁ pabbajitaṁ kāsāyavasanaṁ.
dn14:2.14.2 Disvā sārathiṁ āmantesi:
dn14:2.14.3 ‘ayaṁ pana, samma sārathi, puriso kiṅkato?
dn14:2.14.4 Sīsampissa na yathā aññesaṁ, vatthānipissa na yathā aññesan’ti?
dn14:2.14.5 ‘Eso kho, deva, pabbajito nāmā’ti.
dn14:2.14.6 ‘Kiṁ paneso, samma sārathi, pabbajito nāmā’ti?
dn14:2.14.7 ‘Eso kho, deva, pabbajito nāma sādhu dhammacariyā sādhu samacariyā sādhu kusalakiriyā sādhu puññakiriyā sādhu avihiṁsā sādhu bhūtānukampā’ti.
dn14:2.14.8 ‘Sādhu kho so, samma sārathi, pabbajito nāma, sādhu dhammacariyā sādhu samacariyā sādhu kusalakiriyā sādhu puññakiriyā sādhu avihiṁsā sādhu bhūtānukampā.
dn14:2.14.9 Tena hi, samma sārathi, yena so pabbajito tena rathaṁ pesehī’ti.
dn14:2.14.10 ‘Evaṁ, devā’ti kho, bhikkhave, sārathi vipassissa kumārassa paṭissutvā yena so pabbajito tena rathaṁ pesesi.
dn14:2.14.11 Atha kho, bhikkhave, vipassī kumāro taṁ pabbajitaṁ etadavoca:
dn14:2.14.12 ‘tvaṁ pana, samma, kiṅkato,
dn14:2.14.13 sīsampi te na yathā aññesaṁ, vatthānipi te na yathā aññesan’ti?
dn14:2.14.14 ‘Ahaṁ kho, deva, pabbajito nāmā’ti.
dn14:2.14.15 ‘Kiṁ pana tvaṁ, samma, pabbajito nāmā’ti?
dn14:2.14.16 ‘Ahaṁ kho, deva, pabbajito nāma, sādhu dhammacariyā sādhu samacariyā sādhu kusalakiriyā sādhu puññakiriyā sādhu avihiṁsā sādhu bhūtānukampā’ti.
dn14:2.14.17 ‘Sādhu kho tvaṁ, samma, pabbajito nāma sādhu dhammacariyā sādhu samacariyā sādhu kusalakiriyā sādhu puññakiriyā sādhu avihiṁsā sādhu bhūtānukampā’ti.
dn14:2.15.0 9. Bodhisattapabbajjā
dn14:2.15.1 Atha kho, bhikkhave, vipassī kumāro sārathiṁ āmantesi:
dn14:2.15.2 ‘tena hi, samma sārathi, rathaṁ ādāya itova antepuraṁ paccaniyyāhi.
dn14:2.15.3 Ahaṁ pana idheva kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajissāmī’ti.
dn14:2.15.4 ‘Evaṁ, devā’ti kho, bhikkhave, sārathi vipassissa kumārassa paṭissutvā rathaṁ ādāya tatova antepuraṁ paccaniyyāsi.
dn14:2.15.5 Vipassī pana kumāro tattheva kesamassuṁ ohāretvā kāsāyāni vatthāni acchādetvā agārasmā anagāriyaṁ pabbaji.
dn14:2.16.0 10. Mahājanakāyaanupabbajjā
dn14:2.16.1 Assosi kho, bhikkhave, bandhumatiyā rājadhāniyā mahājanakāyo caturāsītipāṇasahassāni:
dn14:2.16.2 ‘vipassī kira kumāro kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajito’ti.
dn14:2.16.3 Sutvāna tesaṁ etadahosi:
dn14:2.16.4 ‘na hi nūna so orako dhammavinayo, na sā orakā pabbajjā, yattha vipassī kumāro kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajito.
dn14:2.16.5 Vipassīpi nāma kumāro kesamassuṁ ohāretvā kāsāyāni vatthāni acchādetvā agārasmā anagāriyaṁ pabbajissati, kimaṅgaṁ pana mayan’ti.
dn14:2.16.6 Atha kho, so bhikkhave, mahājanakāyo caturāsītipāṇasahassāni kesamassuṁ ohāretvā kāsāyāni vatthāni acchādetvā vipassiṁ bodhisattaṁ agārasmā anagāriyaṁ pabbajitaṁ anupabbajiṁsu.
dn14:2.16.7 Tāya sudaṁ, bhikkhave, parisāya parivuto vipassī bodhisatto gāmanigamajanapadarājadhānīsu cārikaṁ carati.
dn14:2.17.1 Atha kho, bhikkhave, vipassissa bodhisattassa rahogatassa paṭisallīnassa evaṁ cetaso parivitakko udapādi:
dn14:2.17.2 ‘na kho metaṁ patirūpaṁ yohaṁ ākiṇṇo viharāmi, yannūnāhaṁ eko gaṇamhā vūpakaṭṭho vihareyyan’ti.
dn14:2.17.3 Atha kho, bhikkhave, vipassī bodhisatto aparena samayena eko gaṇamhā vūpakaṭṭho vihāsi, aññeneva tāni caturāsītipabbajitasahassāni agamaṁsu, aññena maggena vipassī bodhisatto.
dn14:2.18.0 11. Bodhisattaabhinivesa
dn14:2.18.1 Atha kho, bhikkhave, vipassissa bodhisattassa vāsūpagatassa rahogatassa paṭisallīnassa evaṁ cetaso parivitakko udapādi:
dn14:2.18.2 ‘kicchaṁ vatāyaṁ loko āpanno, jāyati ca jīyati ca mīyati ca cavati ca upapajjati ca, atha ca panimassa dukkhassa nissaraṇaṁ nappajānāti jarāmaraṇassa,
dn14:2.18.3 kudāssu nāma imassa dukkhassa nissaraṇaṁ paññāyissati jarāmaraṇassā’ti?
dn14:2.18.4 Atha kho, bhikkhave, vipassissa bodhisattassa etadahosi:
dn14:2.18.5 ‘kimhi nu kho sati jarāmaraṇaṁ hoti, kiṁpaccayā jarāmaraṇan’ti?
dn14:2.18.6 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.7 ‘jātiyā kho sati jarāmaraṇaṁ hoti, jātipaccayā jarāmaraṇan’ti.
dn14:2.18.8 Atha kho, bhikkhave, vipassissa bodhisattassa etadahosi:
dn14:2.18.9 ‘kimhi nu kho sati jāti hoti, kiṁpaccayā jātī’ti?
dn14:2.18.10 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.11 ‘bhave kho sati jāti hoti, bhavapaccayā jātī’ti.
dn14:2.18.12 Atha kho, bhikkhave, vipassissa bodhisattassa etadahosi:
dn14:2.18.13 ‘kimhi nu kho sati bhavo hoti, kiṁpaccayā bhavo’ti?
dn14:2.18.14 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.15 ‘upādāne kho sati bhavo hoti, upādānapaccayā bhavo’ti.
dn14:2.18.16 Atha kho, bhikkhave, vipassissa bodhisattassa etadahosi:
dn14:2.18.17 ‘kimhi nu kho sati upādānaṁ hoti, kiṁpaccayā upādānan’ti?
dn14:2.18.18 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.19 ‘taṇhāya kho sati upādānaṁ hoti, taṇhāpaccayā upādānan’ti.
dn14:2.18.20 Atha kho, bhikkhave, vipassissa bodhisattassa etadahosi:
dn14:2.18.21 ‘kimhi nu kho sati taṇhā hoti, kiṁpaccayā taṇhā’ti?
dn14:2.18.22 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.23 ‘vedanāya kho sati taṇhā hoti, vedanāpaccayā taṇhā’ti.
dn14:2.18.24 Atha kho, bhikkhave, vipassissa bodhisattassa etadahosi:
dn14:2.18.25 ‘kimhi nu kho sati vedanā hoti, kiṁpaccayā vedanā’ti?
dn14:2.18.26 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.27 ‘phasse kho sati vedanā hoti, phassapaccayā vedanā’ti.
dn14:2.18.28 Atha kho, bhikkhave, vipassissa bodhisattassa etadahosi:
dn14:2.18.29 ‘kimhi nu kho sati phasso hoti, kiṁpaccayā phasso’ti?
dn14:2.18.30 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.31 ‘saḷāyatane kho sati phasso hoti, saḷāyatanapaccayā phasso’ti.
dn14:2.18.32 Atha kho, bhikkhave, vipassissa bodhisattassa etadahosi:
dn14:2.18.33 ‘kimhi nu kho sati saḷāyatanaṁ hoti, kiṁpaccayā saḷāyatanan’ti?
dn14:2.18.34 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.35 ‘nāmarūpe kho sati saḷāyatanaṁ hoti, nāmarūpapaccayā saḷāyatanan’ti.
dn14:2.18.36 Atha kho, bhikkhave, vipassissa bodhisattassa etadahosi:
dn14:2.18.37 ‘kimhi nu kho sati nāmarūpaṁ hoti, kiṁpaccayā nāmarūpan’ti?
dn14:2.18.38 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.39 ‘viññāṇe kho sati nāmarūpaṁ hoti, viññāṇapaccayā nāmarūpan’ti.
dn14:2.18.40 Atha kho, bhikkhave, vipassissa bodhisattassa etadahosi:
dn14:2.18.41 ‘kimhi nu kho sati viññāṇaṁ hoti, kiṁpaccayā viññāṇan’ti?
dn14:2.18.42 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.18.43 ‘nāmarūpe kho sati viññāṇaṁ hoti, nāmarūpapaccayā viññāṇan’ti.
dn14:2.19.1 Atha kho, bhikkhave, vipassissa bodhisattassa etadahosi:
dn14:2.19.2 ‘paccudāvattati kho idaṁ viññāṇaṁ nāmarūpamhā, nāparaṁ gacchati.
dn14:2.19.3 Ettāvatā jāyetha vā jiyyetha vā miyyetha vā cavetha vā upapajjetha vā, yadidaṁ
dn14:2.19.4 nāmarūpapaccayā viññāṇaṁ, viññāṇapaccayā nāmarūpaṁ, nāmarūpapaccayā saḷāyatanaṁ, saḷāyatanapaccayā phasso, phassapaccayā vedanā, vedanāpaccayā taṇhā, taṇhāpaccayā upādānaṁ, upādānapaccayā bhavo, bhavapaccayā jāti, jātipaccayā jarāmaraṇaṁ sokaparidevadukkhadomanassupāyāsā sambhavanti.
dn14:2.19.5 Evametassa kevalassa dukkhakkhandhassa samudayo hoti’.
dn14:2.19.6 ‘Samudayo samudayo’ti kho, bhikkhave, vipassissa bodhisattassa pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
dn14:2.20.1 Atha kho, bhikkhave, vipassissa bodhisattassa etadahosi:
dn14:2.20.2 ‘kimhi nu kho asati jarāmaraṇaṁ na hoti, kissa nirodhā jarāmaraṇanirodho’ti?
dn14:2.20.3 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.4 ‘jātiyā kho asati jarāmaraṇaṁ na hoti, jātinirodhā jarāmaraṇanirodho’ti.
dn14:2.20.5 Atha kho, bhikkhave, vipassissa bodhisattassa etadahosi:
dn14:2.20.6 ‘kimhi nu kho asati jāti na hoti, kissa nirodhā jātinirodho’ti?
dn14:2.20.7 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.8 ‘bhave kho asati jāti na hoti, bhavanirodhā jātinirodho’ti.
dn14:2.20.9 Atha kho, bhikkhave, vipassissa bodhisattassa etadahosi:
dn14:2.20.10 ‘kimhi nu kho asati bhavo na hoti, kissa nirodhā bhavanirodho’ti?
dn14:2.20.11 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.12 ‘upādāne kho asati bhavo na hoti, upādānanirodhā bhavanirodho’ti.
dn14:2.20.13 Atha kho, bhikkhave, vipassissa bodhisattassa etadahosi:
dn14:2.20.14 ‘kimhi nu kho asati upādānaṁ na hoti, kissa nirodhā upādānanirodho’ti?
dn14:2.20.15 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.16 ‘taṇhāya kho asati upādānaṁ na hoti, taṇhānirodhā upādānanirodho’ti.
dn14:2.20.17 Atha kho, bhikkhave, vipassissa bodhisattassa etadahosi:
dn14:2.20.18 ‘kimhi nu kho asati taṇhā na hoti, kissa nirodhā taṇhānirodho’ti?
dn14:2.20.19 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.20 ‘vedanāya kho asati taṇhā na hoti, vedanānirodhā taṇhānirodho’ti.
dn14:2.20.21 Atha kho, bhikkhave, vipassissa bodhisattassa etadahosi:
dn14:2.20.22 ‘kimhi nu kho asati vedanā na hoti, kissa nirodhā vedanānirodho’ti?
dn14:2.20.23 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.24 ‘phasse kho asati vedanā na hoti, phassanirodhā vedanānirodho’ti.
dn14:2.20.25 Atha kho, bhikkhave, vipassissa bodhisattassa etadahosi:
dn14:2.20.26 ‘kimhi nu kho asati phasso na hoti, kissa nirodhā phassanirodho’ti?
dn14:2.20.27 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.28 ‘saḷāyatane kho asati phasso na hoti, saḷāyatananirodhā phassanirodho’ti.
dn14:2.20.29 Atha kho, bhikkhave, vipassissa bodhisattassa etadahosi:
dn14:2.20.30 ‘kimhi nu kho asati saḷāyatanaṁ na hoti, kissa nirodhā saḷāyatananirodho’ti?
dn14:2.20.31 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.32 ‘nāmarūpe kho asati saḷāyatanaṁ na hoti, nāmarūpanirodhā saḷāyatananirodho’ti.
dn14:2.20.33 Atha kho, bhikkhave, vipassissa bodhisattassa etadahosi:
dn14:2.20.34 ‘kimhi nu kho asati nāmarūpaṁ na hoti, kissa nirodhā nāmarūpanirodho’ti?
dn14:2.20.35 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.36 ‘viññāṇe kho asati nāmarūpaṁ na hoti, viññāṇanirodhā nāmarūpanirodho’ti.
dn14:2.20.37 Atha kho, bhikkhave, vipassissa bodhisattassa etadahosi:
dn14:2.20.38 ‘kimhi nu kho asati viññāṇaṁ na hoti, kissa nirodhā viññāṇanirodho’ti?
dn14:2.20.39 Atha kho, bhikkhave, vipassissa bodhisattassa yoniso manasikārā ahu paññāya abhisamayo:
dn14:2.20.40 ‘nāmarūpe kho asati viññāṇaṁ na hoti, nāmarūpanirodhā viññāṇanirodho’ti.
dn14:2.21.1 Atha kho, bhikkhave, vipassissa bodhisattassa etadahosi:
dn14:2.21.2 ‘adhigato kho myāyaṁ maggo sambodhāya yadidaṁ—
dn14:2.21.3 nāmarūpanirodhā viññāṇanirodho, viññāṇanirodhā nāmarūpanirodho, nāmarūpanirodhā saḷāyatananirodho, saḷāyatananirodhā phassanirodho, phassanirodhā vedanānirodho, vedanānirodhā taṇhānirodho, taṇhānirodhā upādānanirodho, upādānanirodhā bhavanirodho, bhavanirodhā jātinirodho, jātinirodhā jarāmaraṇaṁ sokaparidevadukkhadomanassupāyāsā nirujjhanti.
dn14:2.21.4 Evametassa kevalassa dukkhakkhandhassa nirodho hoti’.
dn14:2.21.5 ‘Nirodho nirodho’ti kho, bhikkhave, vipassissa bodhisattassa pubbe ananussutesu dhammesu cakkhuṁ udapādi, ñāṇaṁ udapādi, paññā udapādi, vijjā udapādi, āloko udapādi.
dn14:2.22.1 Atha kho, bhikkhave, vipassī bodhisatto aparena samayena pañcasu upādānakkhandhesu udayabbayānupassī vihāsi:
dn14:2.22.2 ‘iti rūpaṁ, iti rūpassa samudayo, iti rūpassa atthaṅgamo;
dn14:2.22.3 iti vedanā, iti vedanāya samudayo, iti vedanāya atthaṅgamo;
dn14:2.22.4 iti saññā, iti saññāya samudayo, iti saññāya atthaṅgamo;
dn14:2.22.5 iti saṅkhārā, iti saṅkhārānaṁ samudayo, iti saṅkhārānaṁ atthaṅgamo;
dn14:2.22.6 iti viññāṇaṁ, iti viññāṇassa samudayo, iti viññāṇassa atthaṅgamo’ti,
dn14:2.22.7 tassa pañcasu upādānakkhandhesu udayabbayānupassino viharato na cirasseva anupādāya āsavehi cittaṁ vimuccīti.
dn14:2.22.8 Dutiyabhāṇavāro.